ຕາມຂ່າວCRI: ງານຕະຫຼາດນັດການຄ້າແລະການທ່ອງທ່ຽວຕາມເຂດຊາຍແດນສິບສອງພັ່ນນາຄັ້ງທີ 17 ໄດ້ໄຂຂຶ້ນຢູ່ນະຄອນຊຽງຮຸ່ງເທດສະບານກິ່ງແຂວງສິບສອງພັ່ນນາຂອງແຂວງຢຸນນານຈີນໃນວັນທີ 13 ເມສານີ້, ໃນວັນດັ່ງກ່າວ ໄດ້ເຊັນສັນຍາໂຄງການລົງທຶນແລະຮ່ວມມືທັງໝົດ 14 ໂຄງການ, ເຊິ່ງມູນຄ່າໃນສັນຍາໄດ້ບັນລຸເຖິງ 19 ຕື້ຢວນ.
ງານຕະຫຼາດນັດຄັ້ງນີ້ຈະດຳເນີນໄປເປັນເວລາ 5 ວັນ, ໂດຍມີການວາງສະແດງຜະລິດຕະພັນຂາເຂົ້າຂາອອກແລະຜະລິດຕະພັນກະສິກຳປະເພດຕ່າງໆ, ນຳສະເໜີໂຄງການລົງທຶນ, ການປຶກສາຫາລືກັນກ່ຽວກັບການຮ່ວມມືດ້ານເສດຖະກິດເຕັກໂນໂລຊີ, ການເຊັນສັນຍາຂອງໂຄງການຕ່າງໆແລະອື່ນໆ. ໃນງານຕະຫຼາດນັດລວມມີບ່ອນວາງສະແດງ 456 ບ່ອນ, ມີວິສາຫະກິດ 344 ແຫ່ງເຂົ້າຮ່ວມ, ໄດ້ດຶງດູດນັກທຸລະກິດທີ່ມາຈາກຫຼາຍປະເທດເຂົ້າຮ່ວມເຊັ່ນ:ໄທ, ລາວ, ກຳປູເຈຍ, ມຽນມາ, ຫວຽດນາມແລະອາເມລິກາເປັນຕົ້ນເຊິ່ງໄດ້ນຳເອົາສິນຄ້າປະເພດຕ່າງໆມາວາງສະແດງໃນງານຄື: ຜະລິດຕະພັນດ້ານກະສິກຳພື້ນເມືອງ, ສິນຄ້າທ່ອງທ່ຽວ, ເຄື່ອງນຸ່ງປະຈຳຊົນເຜົ່າ, ເຄື່ອງເອ້ຄຳແລະເງິນ, ເພັດນິນຈິນດາ, ເຟີນີເຈີໄມ້ດູ່ແລະອື່ນໆ.
ມາຮອດປະຈຸບັນ, ງານຕະຫຼາດນັດສິບສອງພັ່ນນາໄດ້ຈັດຂຶ້ນຢ່າງສຳເລັດຜົນມາແລ້ວທັງໝົດ 16 ຄັ້ງ, ລະດັບການຫັນເປັນວິຊາການ, ການຫັນເປັນຍີ່ຫໍ້ ແລະການຫັນເປັນຕະຫຼາດລ້ວນແຕ່ໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ, ໄດ້ກາຍເປັນເວທີທີ່ສຳຄັນຂອງປະເທດຕ່າງໆໃນພາກພື້ນໃນການປຶກສາຫາລືດ້ານການຄ້າ, ການວາງສະແດງດ້ານການທ່ອງທ່ຽວ, ການແລກປ່ຽນດ້ານວັດທະນະທຳແລະການເພີ່ມທະວີມິດຕະພາບແລະການຮ່ວມມື. ທ່ານໂຫຼຫົງຈ່ຽງ, ເຈົ້າຄອງກິ່ງແຂວງສິບສອງພັ່ນນາກ່າວໃນພິທີໄຂງານວ່າ, ສິບສອງພັ່ນນາຫວັງຢາກໃຫ້ຖືງານຕະຫຼາດນັດເປັນໂອກາດ, ຮ່ວມກັບປະເທດຕ່າງໆໃນພາກພື້ນທຳຄວາມພະຍາຍາມແລະຮ່ວມມືກັນ, ລົງເລິກການແລກປ່ຽນແລະການຮ່ວມມືລະຫວ່າງປະເທດຕ່າງໆຢູ່ອະນຸພາກພື້ນແມ່ນ້ຳລ້ານຊ້າງ-ແມ່ນ້ຳຂອງໃນຫຼາຍຂົງເຂດຕື່ມອີກເຊັ່ນ: ເສດຖະກິດ, ວັດທະນະທຳແລະການທ່ອງທ່ຽວເປັນຕົ້ນ, ປະກອບສ່ວນອັນໃໝ່ເຂົ້າໃນການຊຸກຍູ້ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້.