ວັນທີ 15 ເມສານີ້ ຢູ່ນະຄອນຫຼວງປັກກິ່ງຂອງຈີນ, ທ່ານສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານເຊີແກ ລັຟຣົຟ ລັດຖະມົນຕີວ່າການກະຊວງການຕ່າງປະເທດຣັດເຊຍ. ທ່ານສີຈິ້ນຜິງກ່າວວ່າ, ໃນປັດຈຸບັນ, ການພົວພັນຈີນ-ຣັດເຊຍກຳລັງຢູ່ໃນໄລຍະທີ່ດີທີ່ສຸດໃນປະຫວັດສາດ, ສອງຝ່າຍຄວນ ຫັນຄວາມໄວ້ເນື້ອເຊື່ອໃຈທາງຍຸດທະສາດໃນລະດັບສູງໃຫ້ ເປັນຜົນສຳເລັດການຮ່ວມມືຕົວຈິງທີ່ກວ້າງຂວາງກວ່າເກົ່າ.
ທ່ານລັຟຣົຟໄດ້ສົ່ງຄວາມອວຍພອນອັນດີງາມຂອງທ່ານປະທານາທິບໍດີວຣາດີເມຍປູຕິນທີ່ຝາກນຳທ່ານນັ້ນໄປໃຫ້ທ່ານສີຈິ້ນຜິງ. ທ່ານລັຟຣົຟກ່າວວ່າ, ສາຍພົວພັນຄູ່ຮ່ວມມືປະສານງານຮອບດ້ານຣັດເຊຍ-ຈີນມີຜົນສະທ້ອນອັນສຳຄັນທີ່ສຸດຕໍ່ທົ່ວໂລກ. ຝ່າຍຣັດເຊຍຍິນດີສືບຕໍ່ເພີ່ມທະວີການທຳຄວາມເຂົ້າໃຈ,ປະສານງານແລະຮ່ວມມືກັນກັບຈີນ. ທ່ານປະທານາທິບໍດີປູຕິນຄອງຄອຍຈະເດີນທາງໄປຢ້ຽມຢາມຈີນແລະເຂົ້າຮ່ວມກອງປະຊຸມສຸດຍອດວ່າດ້ວຍການປະສານງານແລະສ້າງຄວາມໄວ້ເນື້ອເຊື່ອໃຈກັນໃນອາຊີທີ່ຈະຈັດຂຶ້ນຢູ່ຊຽງໄຮ. ຝ່າຍຣັດເຊຍຍິນດີທຳຄວາມພະຍາຍາມຮ່ວມກັບຈີນ, ເຮັດໃຫ້ການຢ້ຽມຢາມຂອງທ່ານປູຕິນໄດ້ຮັບຜົນສຳເລັດອັນຈົບງາມ,ແລະຊຸກຍູ້ໃຫ້ກອງປະຊຸມສຸດຍອດວ່າດ້ວຍການປະສານງານແລະສ້າງຄວາມໄວ້ເນື້ອເຊື່ອໃຈກັນໃນອາຊີໄດ້ຮັບຜົນສຳເລັດທີ່ດີ, ເພີ່ມຄວາມມີຊີວິດຊີວາໃຫ້ແກ່ການພົວພັນຣັດເຊຍ-ຈີນ.