ໃນກອງປະຊຸມຂ່າວທີ່ຈັດຂຶ້ນຢູ່ທີ່ປັກກິ່ງໃນວັນທີ 14 ເມສານີ້, ທ່ານນາງ ຮວ້າຊຸ່ນຢິງ, ໂຄສົກກະຊວງການຕ່າງປະເທດຈີນ ກ່າວວ່າ, ຖ້າຢາກຈະຊຸກຍູ້ຂະບວນການຫຼຸດກຳລັງຮົບດ້ານນິວເຄລຍ, ກໍຕ້ອງຮັກສາຄວາມກ້ຳເກິ່ງກັນແລະຄວາມໝັ້ນຄົງທາງດ້ານຍຸດທະສາດສາກົນ, ປະເທດທີ່ກ່ຽວຂ້ອງຄວນປະລະນະໂຍບາຍຕ່າງໆ ເຊັ່ນ ຮົ່ມອາລັກຂານິວເຄລຍ ແລະ ການຊົມໃຊ້ນິວເຄລຍຮ່ວມກັນ.
ໃນກອງປະຊຸມຂ່າວໃນຄັ້ງນີ້ ມີນັກຂ່າວຖາມວ່າ: ຕາມຂ່າວແຈ້ງວ່າ, ລັດຖະມົນຕີວ່າການກະຊວງການຕ່າງປະເທດຂອງຫຼາຍປະເທດ ເຊັ່ນ ຍີ່ປຸ່ນເປັນຕົ້ນ ໄດ້ອອກ "ຖະແຫຼງການຮີໂຣຊີມາ" ພາຍຫຼັງກອງປະຊຸມວ່າດ້ວຍການລິເລີ່ມຫຼຸດກຳລັງຮົບດ້ານນິວເຄລຍ ແລະ ບໍ່ແຜ່ຜາຍນິວເຄລຍ ທີ່ຈັດຂຶ້ນຢູ່ຮີໂຣຊີມາຍີ່ປຸ່ນໄດ້ສິ້ນສຸດລົງ, ໂດຍຮຽກຮ້ອງໃຫ້ມີການເຈລະຈາກ່ຽວກັບການຫຼຸດກຳລັງຮົບດ້ານນິວເຄລຍລະຫວ່າງ ຫຼາຍຝ່າຍ ເຊິ່ງລວມທັງອາເມລິກາ, ຣັດເຊຍ ແລະ ຈີນ. ຝ່າຍຈີນມີການວິຈານແນວໃດຕໍ່ເລື່ອງນີ້?
ທ່ານນາງ ຮົ້ວຊຸ່ນຢິງ ກ່າວວ່າ: ການຊຸກຍູ້ຂະບວນການຫຼຸດກຳລັງຮົບດ້ານນິວເຄລຍ ແລະ ບັນລຸໃຫ້ໂລກປອດນິວເຄລຍ ແມ່ນຄວາມປາຖະໜາຮ່ວມຂອງປະຊາຄົມໂລກ, ປະເທດທີ່ມີອາວຸດນິວເຄລຍໄດ້ທຳຄວາມພະຍາຍາມບໍ່ໜ້ອຍເພື່ອຄວາມປາດຖະໜາດັ່ງກ່າວ. ນາງ ກ່າວຕື່ມວ່າ: ຖ້າຢາກຈະຊຸກຍູ້ຂະບວນການຫຼຸດກຳລັງຮົບນິວເຄລຍ, ກໍຕ້ອງຮັກສາຄວາມກ້ຳເກິ່ງກັນແລະຄວາມໝັ້ນຄົງທາງດ້ານຍຸດທະສາດສາກົນ, ປະເທດທີ່ກ່ຽວຂ້ອງຄວນປະລະນະໂຍບາຍຕ່າງໆ ເຊັ່ນ ຮົ່ມອາລັກຂານິວເຄລຍ ແລະ ການຊົມໃຊ້ນິວເຄລຍຮ່ວມກັນ.