ຫວ່າງມໍ່ໆມານີ້, ກອງປະຊຸມປະຈຳປີລະດູໃບໄມ້ປົ່ງຂອງອົງການກອງທຶນເງິນຕາສາກົນຫຼື IMF ທີ່ດຳເນີນມາເປັນເວລາ 3 ວັນໄດ້ອັດລົງແລ້ວຢູ່ນະຄອນຫຼວງວໍຊິງຕັນຂອງອາເມລິກາ, ໃນໄລຍະໄຂກອງປະຊຸມ, ຍຸດທະສາດດ້ານການພັດທະນາເສດຖະກິດຂອງຈີນໄດ້ຮັບຄວາມສົນໃຈຈາກຝ່າຍຕ່າງໆທີ່ກ່ຽວຂ້ອງຢ່າງກວ້າງຂວາງ.
ທ່ານຈູ່ມິນ, ຮອງຜູ້ອຳນວຍການໃຫຍ່ອົງການ IMF ກ່າວໃນກອງປະຊຸມຂ່າວທີ່ຈັດຂຶ້ນໃນວັນທີ 13 ເມສານີ້ວ່າ, "ລັດຖະມົນຕີການເງິນແລະຜູ້ວ່າການທະນາຄານກາງຂອງປະເທດຕ່າງໆໄດ້ສະແດງຄວາມຍ້ອງຍໍຊົມເຊີຍຕໍ່ຈີນທີ່ສາມາດພັດທະນາເສດຖະກິດຢ່າງໝັ້ນທ່ຽງ, ເຫັນວ່າເສດຖະກິດຈີນຈະສາມາດສືບຕໍ່ຮັກສາຈັງຫວະການເຕີບໂຕໃຫ້ຢູ່ລະຫວ່າງ 7% ຫາ 7,5%, ນີ້ແມ່ນເລື່ອງທີ່ດີ, ເພາະວ່ານີ້ໄດ້ເສີມຂະຫຍາຍບົດບາດຢ່າງໃຫຍ່ໃນການເຮັດໃຫ້ເສດຖະກິດໂລກມີການເຕີບໂຕຢ່າງໝັ້ນທ່ຽງ, ໃນໄລຍະໄຂກອງປະຊຸມຄັ້ງນີ້, ສິ່ງທີ່ຫຼາຍປະເທດສະເພາະຢ່າງຍິ່ງແມ່ນປະເທດອາຟຣິກາແລະປະເທດອາເມລິກາລາຕິນເອົາໃຈໃສ່ທີ່ສຸດນັ້ນບໍ່ແມ່ນເສດຖະກິດໂລກ, ຫາກແມ່ນຍຸດທະສາດດ້ານການພັດທະນາເສດຖະກິດຂອງຈີນ. "
ພ້ອມດຽວກັນນັ້ນ, ທ່ານຈູ່ມິນກໍ່ໄດ້ຊີ້ອອກວ່າ, ໃນຂະນະທີ່ສະແຫວງຫາການພັດທະນາເສດຖະກິດຢ່າງມີຄວາມດຸນດ່ຽງ, ຈີນກໍ່ໄດ້ຫຼຸດການລົງທຶນໃຫ້ໜ້ອຍລົງ,ນີ້ຈະມີຜົນກະທົບຕໍ່ຈີເລ, ເບຼຊິນ, ອົສຕຼາລີ, ສ.ເກົາຫຼີ, ໄທແລະປະເທດອື່ນໆທີ່ສົ່ງອອກຜະລິດຕະພັນອຸດສາຫະກຳການການຜະລິດແລະແຮ່ທາດຕໍ່ຈີນ, ທັງນີ້ຮຽກຮ້ອງໃຫ້ທົ່ວໂລກທຳການປັບປຸງທີ່ເໝາະສົມ, ເພາະວ່າເວົ້າໂດຍລວມແລ້ວ, ການພັດທະນາເສດຖະກິດຂອງຈີນມີຄວາມດຸນດ່ຽງແລ້ວ, ກໍ່ຈະມີຜົນດີຕໍ່ເສດຖະກິດໂລກເຊັ່ນກັນ.
 |
