ວັນທີ 23 ເມສານີ້, ຢູ່ຮົງກົງ, ອົງການປົກຄອງເຂດບໍລິຫານພິເສດຮົງກົງກັບລັດຖະບານຟີລິບປິນໄດ້ອອກຖະແຫຼງການຮ່ວມກ່ຽວກັບເຫດການຈີ້ຕົວປະກັນທີ່ມານີລາ. ລັດຖະບານຟີລິບປິນຂໍໂທດຢ່າງເປັນທາງການຕໍ່ຜູ້ຖືກເຄາະຮ້າຍຈາກເຫດການພ້ອມດ້ວຍຄອບຄົວຂອງເຂົາເຈົ້າ, ເປີດເຜີຍມາດຕະການລົງໂທດຕໍ່ຜູ້ກ່ຽວຂ້ອງພ້ອມດ້ວຍມາດຕະການປັບປຸງການຮັບປະກັນຄວາມປອດໄພຂອງນັກທ່ອງທ່ຽວ.
ຖະແຫຼງການຮ່ວມຂຽນວ່າ, ທ່ານລຽງເຈີ້ນຢິ່ງ ຜູ້ວ່າການເຂດບໍລິຫານພິເສດຮົງກົງແລະທ່ານເບນິກໂນ ອາກີໂນ Ⅲ ປະທານາທິບໍດີຟີລິບປິນເຫັນດີສະແຫວງຫາແຜນການແກ້ໄຂທີ່ເຮັດໃຫ້ທັງສອງຝ່າຍເພິ່ງພໍໃຈກ່ຽວກັບເຫດການຈີ້ຕົວປະກັນທີ່ເກີດຂຶ້ນຢູ່ນະຄອນຫຼວງມານີລາຂອງຟີລິບປິນໃນວັນທີ 23 ສິງຫາ 2010. ອົງການປົກຄອງເຂດບໍລິຫານພິເສດຮົງກົງແລະລັດຖະບານຟີລິບປິນເຫັນດີແກ້ໄຂຕາມຄວາມຮຽກຮ້ອງຂອງຜູ້ຖືກເຄາະຮ້າຍພ້ອມດ້ວຍຄອບຄົວໃນ 4 ດ້ານ ຄື ຂໍໂທດ, ທົດແທນຄວາມເສຍຫາຍ, ລົງໂທດເຈົ້າໜ້າທີ່ຊີ້ນຳແລະບຸກຄົນອື່ນໆທີ່ກ່ຽວຂ້ອງພ້ອມດ້ວຍການໃຊ້ມາດຕະການຮັບປະກັນຄວາມປອດໄພຂອງນັກທ່ອງທ່ຽວ.