ວັນທີ 23 ເມສານີ້, ທ່ານລຽງເຈິ້ງຢິ່ງ ຜູ້ວ່າການເຂດບໍລິຫານພິເສດຮົງກົງຈີນປະກາດວ່າ, ອົງການປົກຄອງຮົງກົງກັບລັດຖະບານຟີລິບປິນໄດ້ບັນລຸຄວາມຮັບຮູ້ເປັນເອກະສັນກັນກ່ຽວກັບເຫດການຈີ້ຕົວປະກັນທີ່ມານີລາ, ອົງການປົກຄອງເຂດບໍລິຫານພິເສດຮົງກົງຍົກເລີກມາດຕະການລົງໂທດຕໍ່ຟີລິບປິນເລີ່ມແຕ່ວັນທີ 23 ເມສານີ້ເປັນຕົ້ນໄປ, ພ້ອມທັງປັບຫຼຸດລະດັບການເຕືອນໄພໄປທ່ອງທ່ຽວຢູ່ຟີລິບປິນຈາກລະດັບສີດຳໃຫ້ຫຼຸດລົງເຖິງລະດັບສີເຫຼືອງ. ໃນວັນດຽວກັນ, ທຳນຽບປະທານາທິບໍດີຟີລິບປິນກ່າວວ່າ, ສາຍພົວພັນລະຫວ່າງຟີລິບປິນກັບຮົງກົງກຳລັງໄດ້ຮັບການຟື້ນຟູຄືນສູ່ປົກກກະຕິ.
ໃນເວລາພົບປະກັບນັກຂ່າວ, ທ່ນໂຈເຊັຟ ເອັສຕຣາດາ ເຈົ້າຄອງນະຄອນຫຼວງມານີລາຂອງຟີລິບປິນກ່າວວ່າ, ທ່ານເດີນທາງໄປຮົງກົງໃນເທື່ອນີ້ແມ່ນຕາງໜ້າໃຫ້ຄະນະລັດຖະບານຟີລິບປິນກ່າວຂໍໂທດ, ເຫດການຈີ້ຕົວປະກັນຊາວຮົງກົງແມ່ນເກີດຂຶ້ນຢູ່ນະຄອນຫຼວງມານີລາ, ເຈົ້າຄອງນະຄອນເປັນຜູ້ຊີ້ນຳເຈົ້າໜ້າທີ່ຕຳຫຼວດ, ດ້ວຍເຫດນີ້,ສາມາດໃຫ້ເຈົ້າຄອງນະຄອນເປັນຜູ້ກ່າວຂໍໂທດ. ທ່ານເຜີຍໃຫ້ຮູ້ວ່າ, ຍອມຈຳນວນຄ່າທົດແທນທີ່ຜູ້ຖືກເຄາະຮ້າຍພ້ອມດ້ວຍຄອບຄົວຈະໄດ້ຮັບນັ້ນມີມູນຄ່າຫຼາຍກວ່າ 20 ລ້ານໂດລາຮົງກົງ.
 |
