ອາເມລິກາຕີລາຄາສູງຕໍ່ກອງປະຊຸມປະຈຳປີຂອງເວທີປຶກສາຫາລືກອງທັບເຮືອມະຫາສະໝຸດປາຊີຟິກຕາເວັນຕົກທີ່ຮັບຮອງ "ກະຕິກາການພົບພໍ້ໂດຍບັງເອີນຢູ່ເທິງທະເລ"

ຕາມຂ່າວCRI: ວັນທີ 23 ເມສານີ້, ທ່ານສຕີເຟັນ ວາເຣັນ ໂຄສົກກະຊວງປ້ອງກັນປະເທດອາເມລິກາກ່າວວ່າ, ກະຊວງປ້ອງກັນປະເທດອາເມລິກາໄດ້ສະແດງຄວາມຊົມເຊີຍຕໍ່ກອງປະຊຸມປະຈຳປີຂອງເວທີປຶກສາຫາລືກອງທັບເຮືອມະຫາສະໝຸດປາຊີຟິກຕາເວັນຕົກຄັ້ງທີ 14 ທີ່ຈັດຂຶ້ນຢູ່ນະຄອນຊິ່ງຕາວແຂວງຊ່ານຕຸ່ງຂອງຈີນເຊິ່ງໄດ້ຜ່ານຮັບຮອງເອົາ"ກະຕິກາການພົບພໍ້ໂດຍບັງເອີນຢູ່ເທິງທະເລ"ຢ່າງເປັນທາງການ.

ທ່ານສຕີເຟັນ ວາເຣັນກ່າວວ່າ, ການຮັບຮອງເອົາກະຕິກາສະບັບນີ້ຈະເປັນການຊຸກຍູ້ການສົນທະນາແລະການແລກປ່ຽນລະຫວ່າງກອງທັບເຮືອຂອງປະເທດຕ່າງໆຕື່ມອີກ, ຫຼຸດຜ່ອນຄວາມເຂົ້າໃຈຜິດຕໍ່ການເຄື່ອນໄຫວການທະຫານເທິງທະເລຂອງປະເທດຕ່າງໆ, ຫຼຸດຄວາມສ່ຽງດ້ານການເກີດເຫດຕຳກັນແລະເຫດອື່ນໆຂອງກອງທັບເຮືອໃນເວລາເຄື່ອນໄຫວຢູ່ເຂດທະເລຫຼວງ, ຍົກສູງຄວາມປອດໄພດ້ານການເຄື່ອນໄຫວເທິງທະເລຢ່າງແຂງແຮງ, ມີຄວາມໝາຍອັນຕັ້ງໜ້າໃນການປົກປັກຮັກສາສະເຖຍລະພາບຂອງພາກພື້ນ.