ແຫຼ່ງຂ່າວກະຊວງອຸດສາຫະກຳ-ການຄ້າເປີດເຜີຍວ່າ: ສົກປີໃໝ່ນີ້ ລາວວາງເປົ້າໃຫ້ການສົ່ງອອກສີນຄ້າເພີ່ມຂຶ້ນ15% ແລະ ສູ້ຊົນເຮັດໃຫ້ຜະລິດຕະພັນອຸດສາຫະກຳປຸງແຕ່ງ ແລະ ຫັດຖະກຳຂະຫຍາຍຕົວຢູ່ໃນລະດັບ12% ກວມເອົາ10%ຂອງລວມຍອດຜະລິດຕະພັນພາຍໃນ(GDP) ເຮັດໃຫ້ມູນຄ່າການຈະລາຈອນສິນຄ້າຂະຫຍາຍຕົວຢູ່ໃນລະດັບ12% ກວມເອົາ21%ຂອງGDP.
ປັດຈຸບັນ ທົ່ວປະເທດມີໂຮງງານອຸດສາຫະກໍາປຸງແຕ່ງ ແລະ ຫັດຖະກໍາທັງໝົດຫລາຍກວ່າ 38,000ແຫ່ງ,ໃນນັ້ນຂະໜາດໃຫຍ່ມີ454 ຫົວໜ່ວຍ,ກາງ 582 ຫົວໜ່ວຍ ແລະ ຂະໜາດນ້ອຍມີຫລກຍກວ່າ 9100 ຫົວໜ່ວຍ,ຂະໜາດນ້ອຍແບບຄອບຄົວ 27.900 ກວ່າຫົວໜ່ວຍ. ປີຜ່ານມານີ້ ຍອດມູນຄ່າການຜະລິດຂອງອຸດສາຫະກໍາປຸງແຕ່ງ ແລະ ຫັດຖະກໍາບັນລຸໄດ້ຫລາຍກວ່າ 5.000 ຕື້ກີບທຽບໃສ່ສົກປີ2011-2012ເພີ່ມຂຶ້ນ 10% ,ສ່ວນຍອດມູນຄ່າສົ່ງອອກສິນຄ້າບັນລຸໄດ້ເກືອບ 2 ຕື້ໂດລາສະຫະລັດເພີ່ມຂຶ້ນ 11% ທຽບໃສ່ສົກປີ2011-2012.
ແຕ່ເຖິງແນວໃດກໍດີ,ເພື່ອສົ່ງເສີນການຜະລິດສິນຄ້າພາຍໃນໃຫ້ມີຄວາມເຂັ້ມແຂງນັ້ນ, ຂະແໜງການດັ່ງກ່າວຈະຕ້ອງໄດ້ປັບປຸງບາງລະບຽບການເພື່ອການພັດທະນາ ແລະ ຄຸ້ມຄອງອຸດສາຫະກໍາ ໃຫ້ດີຂຶ້ນກວ່າເກົ່າ, ພ້ອມເອົາໃຈໃສ່ພັດທະນາອຸດສາຫະກໍາປຸງແຕ່ງທີ່ມີພື້ນຖານວັດຖຸດິບພາຍໃນ ແລະ ສົ່ງເສີມໃຫ້ມີໜໍ່ແໜງອຸດສາຫະກໍາໜັກ ແລະ ທັນສະໄໝເທື່ອສະກ້າວ, ຈັດຕັ້ງ ແລະ ປັບປຸງກຸ່ມຜະລິດຫັດຖະກໍາໃຫ້ເຂັ້ມແຂງ, ມີຄຸມນະພາບ ແລະ ອອກແບບໃຫ້ແທດເໝາະກັບຄວາມຕ້ອງການຂອງຕະຫລາດ, ສຸມໃສ່ຜະລິດເປັນສິນຄ້າ ເພື່ອສົ່ງອອກໃຫ້ຫລາກຫລາຍໂດຍສະເພາະອຸດສາຫະກໍາປຸງແຕ່ງກະສິກໍາ, ອຸດສາຫະກໍາໄມ້,ສະບຽງອາຫານ, ວັດສະດຸກໍ່ສ້າງ, ອຸດສາຫະກໍາຕັດຫຍິບ ແລະຕໍ່າແຜ່ນໃຫ້ຫລາຍຂຶ້ນກວ່າເກົ່າ.