ວັນທີ 24 ເມສານີ້ໃນເວລາໃຫ້ສຳພາດຕໍ່CNNຂອງອາເມລິກາ, ທ່ານນາຈິບ ຣາຊັກ, ນາຍົກລັດຖະມົນຕີມາເລເຊຍກ່າວວ່າ, ມາເລເຊຍໄດ້ສົ່ງບົດລາຍງານເບື້ອງຕົ້ນກ່ຽວກັບເຮືອບິນໂດຍສານຂອງສາຍການບິນມາເລເຊຍທີ່ຫາຍສາບສູນສະບັບໜຶ່ງໃຫ້ແກ່ອົງການການບິນພົນລະເຮືອນສາກົນແລ້ວ, ແລະກຽມຈະເປີດເຜີຍໃນອາທິດໜ້າ.
ທ່ານນາຈິບຍັງກ່າວວ່າ, ເຫດການເຮືອບິນໂດຍສານຂອງບໍລິສັດການບິນມາເລເຊຍຫາຍສາບສູນເທື່ອນີ້ແມ່ນ "ເຫດການຜິດປົກກະຕິ", ແລະ "ບໍ່ເຄີຍມີມາກ່ອນ", ສະພາບການລວມຕ່າງກັນກັບເຫດການເຮືອບິນຕົກຂອງບໍລິສັດການບິນສິງກະໂປທີ່ເກີດຂຶ້ນໃນປີ 1997 ແລະເຫດການທີ່ເຮືອບິນໂດຍສານຂອງບໍລິສັດການບິນຝຣັ່ງຕົກທີ່ເກີດຂຶ້ນເມື່ອປີ 2009.
ໃນງານຖະແຫຼງຂ່າວທີ່ຈັດຂຶ້ນໃນວັນທີ 24 ເມສານີ້, ທ່ານຊິນກ່າງ, ໂຄສົກກະຊວງການຕ່າງປະເທດຈີນກ່າວວ່າ, ຈີນຈະສົ່ງພະນັກງານເຂົ້າຮ່ວມໜ່ວຍສຳຫຼວດສາກົນກ່ຽວກັບເຫດການເຮືອບິນໂດຍສານຂອງສາຍການບິນມາເລເຊຍຫາຍສາບສູນອີງຕາມສົນທິສັນຍາສາກົນທີ່ກ່ຽວຂ້ອງ, ແລະເຂົ້າຮ່ວມການສຳຫຼວດເຫດການດັ່ງກ່າວຢ່າງຮອບດ້ານແລະເລິກເຊິ່ງ. ຈີນຈະສືບຕໍ່ຮັກສາການຕິດຕໍ່ພົວພັນແລະປະສານສົມທົບຢ່າງໃກ້ຊິດກັບມາເລເຊຍແລະອົສຕຼາລີເປັນຕົ້ນ, ຕັ້ງໜ້າເຂົ້າຮ່ວມການເຄື່ອນໄຫວຊອກຄົ້ນຫາ.
ການຊອກຄົ້ນຫາເຮືອບິນໂດຍສານທີ່ຫາຍສາບສູນຍັງສືບຕໍ່ດຳເນີນໄປທັງທາງອາກາດແລະທາງທະເລຍັງ. ສູນປະສານງານຮ່ວມຂອງອົສຕຼາລີກ່າວວ່າ, ຍານດໍານໍ້າ "Bluefin" ໄດ້ສຳເລັດໜ້າທີ່ຊອກຄົ້ນຫາເຂດໃຈກາງປະມານ 90% ແລ້ວ, ແຕ່ຍັງບໍ່ໄດ້ພົບເຫັນສິ່ງສຳຄັນແຕ່ຢ່າງໃດ.
 |
