ສື່ມວນຊົນຣັດເຊຍລາຍງານວ່າ, ວັນທີ 17 ກໍລະກົດນີ້, ເຮືອບິນໂດຍສານລຳໜຶ່ງຂອງບໍລິສັດການບິນມາເລເຊຍຕົກຢູ່ທາງພາກຕາເວັນອອກຂອງອູແກຣນທີ່ຕິດກັບຊາຍແດນຣັດເຊຍ.
ຂ່າວສານອິນເຕີແຟສ໌ລາຍງານວ່າ, ເຮືອບິນໂດຍສານໂບອິງ 777 ລຳໜຶ່ງຂອງມາເລເຊຍຕົກຢູ່ຫ່າງຈາກເມືອງໂດເນັດຂອງອູແກຣນປະມານ 80 ກິໂລແມັດ. ລາຍງານຂ່າວໄດ້ນຳເອົາຄວາມເວົ້າຂອງຜູ້ໃຫ້ຂໍ້ມູນຂ່າວມາແຈ້ງວ່າ, ເຮືອບິນໂດຍສານລຳນີ້ຖືກຍິງຕົກຢູ່ເທິງຟ້າທີ່ສູງປະມານ 1 ໝື່ນແມັດ. ເຮືອບິນໂດຍສານລຳນີ້ກຳລັງບິນຈາກເມືອງອຳສເຕີດຳຂອງໂຮນລັງໄປສູ່ນະຄອນຫຼວງກົວລາລຳເປີຂອງມາເລເຊຍ, ຕາມແຜນການ, ຈະບິນເຂົ້າສູ່ນ່ານຟ້າຣັດເຊຍໃນເວລາ 20 ໂມງ 20 ນາທີຕາມເວລາວຽງຈັນ.
ປັດຈຸບັນ, ກອງທະຫານອູແກຣນພວມສູ້ຮົບກັບກອງປະກອບອາວຸດຕໍ່ຕ້ານລັດຖະບານຢ່າງດຸເດືອດຢູ່ທາງພາກຕາເວັນອອກ, ເຮືອບິນໂດຍສານລຳນີ້ໄດ້ຕົກຢູ່ໃກ້ກັບບ່ອນທີ່ມີການສູ້ຮົບກັນ.
ບໍລິສັດການບິນມາເລເຊຍໄດ້ຢືນຢັນວ່າໄດ້ຂາດການຕິດຕໍ່ກັບຖ້ຽວບິນ MH17 , ແລະກ່າວວ່າ ໄດ້ຕິດຕໍ່ກັບຖ້ຽວບິນດັ່ງກ່າວເປັນເທື່ອສຸດທ້າຍຢູ່ນ່ານຟ້າອູແກຣນ. ທ່ານຮີຊາມູດິນ ລັດຖະມົນຕີວ່າການກະຊວງປ້ອງກັນປະເທດມາເລເຊຍໄດ້ຮຽກຮ້ອງໃຫ້ຝ່າຍທີ່ກ່ຽວຂ້ອງກວດກາແລະຢືນຢັນສະພາບທີ່ກ່ຽວຂ້ອງ.
