ວັນທີ 22 ກໍລະກົດນີ້, ທ່ານຫົງເຫຼີຍ ໂຄສົກກະຊວງການຕ່າງປະເທດຈີນໄດ້ໃຫ້ທັດສະນະກ່ຽວກັບກໍລະນີສະພາຄວາມໝັ້ນຄົງອົງການສະຫະປະຊາຊາດທີ່ໄດ້ຮັບຮອງເອົາມະຕິວ່າດ້ວຍເຫດການເຮືອບິນຖ້ຽວບິນ MH17 ຂອງສາຍການບິນມາເລເຊຍຕົກ, ທ່ານກ່າວວ່າ, ເຊື້ອໝັ້ນວ່າມະຕິດັ່ງກ່າວນີ້ຈະໄດ້ຮັບການປະຕິບັດຢ່າງຮອບດ້ານ, ແລະຮຽກຮ້ອງອີກຄັ້ງໃໝ່ໃຫ້ຝ່າຍຕ່າງໆທີ່ກ່ຽວຂ້ອງຈົ່ງໃຫ້ການປະສານສົມທົບແລະການຮ່ວມມືໃນການສືບສວນຂອງອົງການປະຕິບັດງານສາກົນເພື່ອສືບສວນຫາສາເຫດທີ່ເຮັດໃຫ້ເກີດເຫດການເຮືອບບິນຕົກໃນຄັ້ງນີ້ຢ່າງຈະແຈ້ງໂດຍໄວ.
ທ່ານຫົງເຫຼີຍໃຫ້ຮູ້ວ່າ, ຕອນເຊົ້າວັນທີ 22 ກໍລະກົດນີ້, ສະພາຄວາມໝັ້ນຄົງອົງການສະຫະປະຊາຊາດໄດ້ຮັບຮອງເອົາມະຕິເລກທີ 2166 ວ່າດ້ວຍບັນຫາເຮືອບບິນໂດຍສານຂອງສາຍການບິນມາເລເຊຍທີ່ເກີດອຸບັດເຫດຕົກຢູ່ພາກຕາເວັນອອກຂອງອູແກຣນ. ການທີ່ຮັບຮອງເອົາມະຕິດັ່ງກ່າວນີ້ຈະສາມາດຊ່ວຍໃຫ້ຝ່າຍຕ່າງໆທີ່ກ່ຽວຂ້ອງເພີ່ມຄວາມໄວ້ເນື້ອເຊື່ອໃຈກັນ, ເພີ່ມທະວີການຮ່ວມມື, ຊຸກຍູ້ໃຫ້ການສືບສວນຂອງໜ່ວຍປະຕິບັດງານສາກົນໄດ້ຮັບຄວາມຄືບໜ້າ. ຝ່າຍຈີນໄດ້ລົງຄະແນນສຽງເຫັນດີໃນການລົງຄະແນນສຽງຕໍ່ມະຕິຄັ້ງນີ້. ຝ່າຍຈີນສະໜັບສະໜູນການດຳເນີນການສືບສວນຢ່າງເປັນອິດສະຫຼະ,ຍຸດຕິທຳແລະພາວະວິໄສຕໍ່ເຫດການເຮືອບິນໂດຍສານຂອງສາຍການບິນມາເລເຊຍຕົກ, ອົງການການບິນພົນລະເຮືອນສາກົນຄວນເສີມຂະຫຍາຍບົດບາດທີ່ສຳຄັນທີ່ສຸດຂອງຕົນໃນການສືບສວນຂອງໜ່ວຍ ປະຕິບັດງານສາກົນ.
 |
