ໂດຍແນໃສ່ເຂດການຄ້າເສລີຈີນ-ອາຊຽນທີ່ໄດ້ຍົກລະດັບຈະສົ່ງຜົນກະທົບແກ່ຕະຫຼາດແລະຂະແໜງການພາຍໃນປະເທດອາຊຽນຫຼືບໍ່, ທ່ານເສິນໂຈ່ວ ຫົວໜ້າກົມອາຊີກະຊວງການຄ້າຈີນໄດ້ກ່າວໃນວັນທີ 22 ກໍລະກົດນີ້ຢູ່ນະຄອນຫຼວງປັກກິ່ງວ່າ, ເຂດການຄ້າເສລີຈີນ-ອາຊຽນທີ່ໄດ້ຍົກລະດັບແມ່ນສາມາດບັນລຸໃຫ້ຜົນປະໂຫຍດຂອງສອງຝ່າຍເຊື່ອມໂຍງເຂົ້າກັນແລະປະກອບເຂົ້າກັນ, ເຊິ່ງສອດຄ່ອງກັບຜົນປະໂຫຍດຮ່ວມຂອງສອງຝ່າຍ, ແລະສາມາດສ້າງຄວາມຜາສຸກຫຼາຍກວ່າເກົ່າໃຫ້ແກ່ປະຊາຊົນທັງສອງຝ່າຍ.
ທ່ານເສິນໂຈ່ວກ່າວວ່າ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນເສັ້ນທາງທີ່ຕ້ອງເດີນຜ່ານໃນການພັດທະນາຂອງປະເທດຕ່າງໆໃນອະນາຄົດ. ການຍົກລະດັບເຂດການຄ້າເສລີຈີນ-ອາຊຽນບໍ່ພຽງແຕ່ຈະສາມາດເຮັດໃຫ້ການຄ້າແລະການລົງທຶນລະຫວ່າງສອງຝ່າຍມີຄວາມສະດວກຫຼາຍຂຶ້ນຢ່າງຫຼວງຫຼາຍເທົ່ານັ້ນ, ພ້ອມດຽວກັນນັ້ນ, ການສ້າງລະບົບໃນດ້ານຕ່າງໆຂອງສອງຝ່າຍເຊັ່ນການເຊື່ອມຈອດກັນ, ການຮັບຮອງມາດຕະຖານເຊິ່ງກັນແລະກັນ, ການຮ່ວມມືຂອງວິສາຫະກິດຂະໜາດກາງແລະນ້ອຍ, ພະລັງງານ, ສິ່ງແວດລ້ອມແລະການພັດທະນາແບບຍືນຍົງເຫຼົ່ານີ້ເປັນຕົ້ນຈະຍົກສູງຄຸນນະພາບດ້ານການຮ່ວມມືຂອງສອງຝ່າຍ, ເພີ່ມຄວາມແຮງໃໝ່ເຂົ້າໃນການຊຸກຍູ້ການພັດທະນາດ້ານເສດຖະກິດຂອງພາກພື້ນແຫ່ງນີ້.
 |
