ວັນທີ 21 ກໍລະກົດນີ້ ສະພາຄວາມໝັ້ນຄົງອົງການສະຫະປະຊາຊາດ ໄດ້ຜ່ານມະຕິ, ໂດຍໄດ້ກ່າວປະນາມຢ່າງຮຸນແຮງຕໍ່ເຫດການຍົນໂດຍສານຖ້ຽວບິນ MH17 ຂອງບໍລິສັດການບິນມາເລເຊຍຕົກ, ພ້ອມທັງຮຽກຮ້ອງໃຫ້ຝ່າຍຕ່າງໆປະກອບສ່ວນເຂົ້າໃນການສືບສວນເຫດການດັ່ງກ່າວຢ່າງເຕັມທີ່.
ຕອບບ່າຍມື້ດຽວກັນ, ສະພາຄວາມໝັ້ນຄົງໄດ້ໄຂກອງປະຊຸມກ່ຽວກັບສະຖານະການຂອງອູແກຣນ ແລະໄດ້ຜ່ານມະຕິຢ່າງເປັນເອກະພາບກັນ. ມະຕິຂຽນວ່າ, ສະພາຄວາມໝັ້ນຄົງສະໜັບສະໜູນການສືບສວນຈາກສາກົນຕໍ່ເຫດການຍົນໂດຍສານຂອງບໍລິສັດການບິນມາເລເຊຍຕົກຢ່າງຮອບດ້ານ, ເຖິງຖອງ ແລະເປັນອິດສະຫຼະ ໂດຍອີງຕາມຫຼັກມາດຖານຂອງການບິນພົນລະເຮືອນສາກົນ, ແລະສະແດງຄວາມເປັນຫ່ວງຕໍ່ການລາຍງານຂ່າວທີ່ວ່າ "ບໍ່ສາມາດເຂົ້າສູ່ສະຖານທີ່ຍົນຕົກໄດ້ຢ່າງເຖິງຖອງ ແລະການເຂົ້າອອກຖືກຈຳກັດ". ສະພາຄວາມໝັ້ນຄົງຮຽກຮ້ອງໃຫ້ກຸ່ມປະກອບອາວຸດທີ່ຢູ່ສະຖານທີ່ຍົນຕົກແລະບໍລິເວນໃກ້ຄຽງນັ້ນ ບໍ່ຄວນໃຊ້ການກະທຳທີ່ອາດຈະທຳລາຍສະພາບເດີມຂອງສະຖານທີ່ຍົນຕົກນັ້ນແຕ່ຢ່າງໃດ, ແລະອະນຸຍາດໃຫ້ຜູ້ສືບສວນສາກົນ ເຂົ້າສູ່ສະຖານທີ່ຍົນຕົກແລະບໍລິເວນໃກ້ຄຽງ "ຢ່າງປອດໄພ, ມີການຮັບປະກັນ ແລະບໍ່ຖືກຈຳກັດ" ໃນທັນທີ.
ມະຕິຍັງຂຽນຕື່ມວ່າ, ສະພາຄວາມໝັ້ນຄົງຮຽກຮ້ອງໃຫ້ຍຸດຕິການເຄື່ອນໄຫວທາງການທະຫານທັງໝົດທີ່ຢູ່ສະຖານທີ່ຍົນຕົກແລະບໍລິເວນໃກ້ຄຽງໃນທັນທີ, ລວມທັງການເຄື່ອນໄຫວທາງການທະຫານຂອງກຸ່ມປະກອບອາວຸດ, ເພື່ອອຳນວຍຄວາມສະດວກໃຫ້ແກ່ການສືບສວນຢ່າງມີການຮັບປະກັນແລະປອດໄພ, ພ້ອມທັງເຕືອນໃຫ້ປະເທດແລະກຸ່ມປະກອບອາວຸດທັງໝົດຢູ່ເຂດດັ່ງກ່າວຈົ່ງໃຫ້ການຮ່ວມມື ຢ່າງເຕັມທີ່ຕໍ່ການສືບສວນເທື່ອນີ້, ລວມທັງການ "ອະນຸຍາດໃຫ້ເຂົ້າສູ່ສະຖານທີ່ຍົນຕົກຢ່າງບໍ່ຖືກຈຳກັດໃນທັນທີ". ສະພາຄວາມໝັ້ນຄົງຍັງຈະລົງໂທດຜູ້ກໍ່ເຫດການ, ແລະຮຽກຮ້ອງໃຫ້ທຸກປະເທດໃຫ້ການຮ່ວມມືຢ່າງເຕັມທີ່.
 |
