ວັນທີ 22 ກໍລະກົດນີ້, ອິສຣາແອນໄດ້ເຄື່ອນໄຫວດ້ານການທະຫານ "Operation Protective Edge"ຕໍ່ເຂກກາຊາເປັນເວລາ 15 ມື້, ສ່ວນການໂຈມຕີທາງພື້ນດິນຂອງທະຫານອິສຣາແອນກໍໄດ້ດໍາເນີນໄປເປັນເວລາ 5 ມື້. ຈໍານວນຜູ້ເສຍຊີວິດຢູ່ເຂດກາຊາມີຫຼາຍກວ່າ 600 ຄົນ, ສ່ວນທະຫານອິສຣາແອນກໍມີຜູ້ເສຍຊີວິດເຖິງ 27 ຄົນ. ມື້ດຽວກັນ, ຝ່າຍອິສຣາແອນໄດ້ຢືນຢັນວ່າມີເຈົ້າໜ້າທີ່ທະຫານຄົນໜຶ່ງໄດ້ເສຍຊີວິດ. ພ້ອມກັນນັ້ນ, ການໄກ່ເກ່ຍຂອງປະຊາຄົມໂລກເພື່ອໃຫ້ຢຸດຍິງຍັງສືບຕໍ່ດໍາເນີນຢູ່, ມື້ດຽວກັນ, ທ່ານບັນກີມູນ, ເລຂາທິການໃຫຍ່ອົງການສະຫະປະຊາຊາດໄດ້ເດີນທາງໄປເຂດທີ່ເກີດການປະທະກັນລະຫວ່າງອິສຣາແອນກັບປາແລັສຕີນ ເພື່ອຮຽກຮ້ອງໃຫ້ຢຸດຕິການປະທະກັນແລະເລີ່ມການສົນທະນາກັນ.
ທ່ານບັນກີມູນກ່າວວ່າ, ຂ້າພະເຈົ້າໄດ້ສົ່ງຂໍ້ສະເໜີອັນດຽວຕໍ່ອິສຣາແອນແລະ ປາແລັສຕີນ ຄື ຢຸດຕິການປະທະກັນ, ເລີ່ມການສົນທະນາກັນ, ປະເຊີນໜ້າກັບສາເຫດຕົ້ນຕໍຂອງການປະທະກັນ, ມີແຕ່ເຮັດແນວນີ້, ພວກເຮົາຈຶ່ງຈະບໍ່ກັບຄືນສູ່ສະພາບດຽວກັນໃນໜຶ່ງປີຫຼືເຄິ່ງປີຕໍ່ໜ້ານີ້ .
