ວັນທີ 28 ສິງຫານີ້, ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງຂອງຈີນ, ທ່ານສີຈິ້ນຜິງ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ພົບປະກັບຫົວໜ້າກົມໃຫຍ່ເສນາທິການກອງທັບຂອງປະເທດຕ່າງໆທີ່ໄດ້ເດີນທາງມາເຂົ້າຮ່ວມກອງປະຊຸມຫົວໜ້າກົມໃຫຍ່ເສນາທິການກອງທັບປະເທດສະມາຊິກອົງການຮ່ວມມືຊຽງໄຮ.
ທ່ານສີຈິ້ນຜິງຊີ້ໃຫ້ເຫັນວ່າ, ໃນຫຼາຍປີຜ່ານມາ, ກອງທັບກໍຄືກຳລັງປ້ອງກັນປະເທດຂອງບັນດາປະເທດສະມາຊິກອົງການຮ່ວມມືຊຽງໄຮໄດ້ຕັ້ງໃຈຜັນຂະຫຍາຍຄວາມຮັບຮູ້ທີ່ເປັນເອກະສັນກັນຂອງປະມຸກລັດບັນດາປະເທດສະມາຊິກ, ດຳເນີນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆ, ເຊິ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາຄວາມໝັ້ນຄົງແລະສະເຖຍລະພາບຂອງພາກພື້ນ.ຝ່າຍຈີນຍິນດີເພີ່ມທະວີການແລກປ່ຽນຄວາມເຫັນທາງຍຸດທະສາດກັບບັນດາປະເທດສະມາຊິກອົງການຮ່ວມມືຊຽງໄຮໃຫ້ແໜ້ນແຟ້ນຍິ່ງຂຶ້ນ,ຮ່ວມມືກັນຕ້ານ 3 ອິດທິກຳລັງຄືອິດທິກຳລັງກໍ່ການຮ້າຍດ້ວຍຄວາມຮຸນແຮງ, ອິດທິກຳລັງແບ່ງແຍກປະເທດຊາດ, ອິດທິກຳລັງຫົວຮຸນແຮງທາງສາສະໜາ, ຮ່ວມກັນຮັບມືກັບໄພຂົ່ມຂູ່ໃໝ່ແລະສິ່ງທ້າທາຍໃໝ່ໃນພາກພື້ນ.
ຫົວໜ້າກົມໃຫຍ່ເສນາທິການຕາຊີກີສະຖານທີ່ເປັນປະເທດປະທານໝູນວຽນຂອງອົງການຮ່ວມມືຊຽງໄຮໄດ້ຕາງໜ້າໃຫ້ບັນດາຝ່າຍຕ່າງປະເທດກ່າວວ່າ, ນັບແຕ່ອົງການຮ່ວມມືຊຽງໄຮສ້າງຕັ້ງຂຶ້ນເປັນຕົ້ນມາ, ການຮ່ວມມືດ້ານການປ້ອງກັນປະເທດແລະຄວາມໝັ້ນຄົງຂອງບັນດາປະເທດສະມາຊິກໄດ້ຮັບຜົນສຳເລັດຢ່າງຫຼວງຫຼາຍ, ກອງທັບຂອງບັນດາປະເທດສະ ມາຊິກຄວນຈັດຕັ້ງປະຕິບັດຄວາມຮັບຮູ້ທີ່ເປັນເອກະສັນກັນຂອງປະມຸກລັດຢ່າງແທ້ຈິງ, ຮ່ວມ ກັນຮັບມືກັບໄພຂົ່ມຂູ່ແລະສິ່ງທ້າທາຍຕໍ່ຄວາມໝັ້ນຄົງທີ່ພາກພື້ນກຳລັງປະເຊີນໜ້າຢູ່, ແລະປົກປັກຮັກສາສັນຕິພາບ, ສະເຖຍລະພາບແລະການພັດທະນາຂອງພາກພື້ນ.
