ຕາມຂ່າວCRI: ວັນທີ 1 ກັນຍານີ້, ທ່ານຈ່າງກ່າວລີ້, ຮອງນາຍົກລັດຖະມົນຕີຈີນໄດ້ເຂົ້າຢ້ຽມຄຳນັບທ່ານວລາດິເມຍ ປູຕີນ, ປະທານາທິບໍດີຣັດເຊຍຢູ່ເມືອງຢາຄູສ, ແລະຮ່ວມກັບທ່ານວລາດິເມຍ ປູຕີນເຂົ້າຮ່ວມພິທີເລີ່ມກໍ່ສ້າງໂຄງການທໍ່ສົ່ງອາຍແກັສທຳມະຊາດສາຍຕາເວັນອອກລະຫວ່າງຈີນກັບຣັດເຊຍທີ່ມີຊື່ວ່າ "ກຳລັງຊີເບຣີອາ"ພາຍໃນດິນແດນຣັດເຊຍ. ວັນທີ 30 ສິງຫາແລ້ວນີ້, ຢູ່ນະຄອນຫຼວງມົສກູຂອງຣັດເຊຍ, ທ່ານຈ່າງກ່າວລີ້ໄດ້ຮ່ວມກັບທ່ານອາຄາດີ ດະໂວໂຄວິກ, ຮອງນາຍົກລັດຖະມົນຕີຣັດເຊຍຮ່ວມເປັນປະທານຈັດກອງປະຊຸມຄັ້ງທີ 11 ຂອງຄະນະກຳມະການຮ່ວມມືດ້ານພະລັງງານລະຫວ່າງຈີນກັບຣັດເຊຍ.