ທ່ານມື້ງຈ້ຽນຈູ້ຕ້ອນຮັບການເຂົ້າຢ້ຽມຄຳນັບຂອງທ່ານສົມແກ້ວ ສີລາວົງ, ຜູ້ວ່າການແທນລັດຖະມົນຕີວ່າການກະຊວງປ້ອງກັນຄວາມສະຫງົບແຫ່ງຊາດລາວ
ຕາມຂ່າວCRI: ວັນທີ 1 ກັນຍານີ້, ທ່ານມື້ງຈ້ຽນຈູ້, ກຳມະການກົມການເມືອງສູນກາງພັກກອມມູນິດຈີນ, ເລຂາທິການໃຫຍ່ຂອງຄະນະກໍາມະການການເມືອງແລະກົດໝາຍສູນກາງໄດ້ຕ້ອນຮັບການເຂົ້າຢ້ຽມຄຳນັບຂອງທ່ານສົມແກ້ວ ສີລາວົງ, ຜູ້ວ່າການແທນລັດຖະມົນຕີວ່າການກະຊວງປ້ອງກັນຄວາມສະຫງົບແຫ່ງຊາດລາວຢູ່ນະຄອນຫຼວງປັກກິ່ງ.
ທ່ານມື້ງຈ້ຽນຈູ້ກ່າວວ່າ, ຫວັງວ່າພາກສ່ວນປ້ອງກັນຄວາມສະຫງົບຈີນລາວຈະລົງເລິກການຮ່ວມມືດ້ານຄວາມໝັ້ນຄົງໃນການປະຕິບັດກົດໝາຍຢູ່ຂົງເຂດລຸ່ມນ້ຳແມ່ນ້ຳຂອງຕື່ມອີກ, ພະຍາຍາມສ້າງກົນໄກດັ່ງກ່າວໃຫ້ເປັນແບບຢ່າງຂອງການຮ່ວມມືດ້ານການປະຕິບັດກົດໝາຍໃນພາກພື້ນ; ປັບປຸງການຮ່ວມມືໃນຂົງເຂດດັ້ງເດີມ, ຕັ້ງໜ້າບຸກເບີກຂົງເຂດຮ່ວມມືໃໝ່ດ້ານການຕໍ່ຕ້ານການກໍ່ການຮ້າຍ, ຕໍ່ຕ້ານການເຂົ້າອອກແດນຢ່າງຜິດກົດໝາຍ, ການກໍ່ອາຊະຍາກຳທາງອິນເຕີເນັດແລະອື່ນໆ.
ທ່ານສົມແກ້ວ ສີລາວົງກ່າວວ່າ, ຍິນດີໃຫ້ຮ່ວມກັນກັບຈີນ, ຊຸກຍູ້ໃຫ້ການຮ່ວມມືດ້ານຄວາມໝັ້ນຄົງໃນການປະຕິບັດກົດໝາຍລະຫວ່າງສອງປະເທດໃຫ້ໄດ້ຮັບຜົນສຳເລັດໃໝ່ຢ່າງຕໍ່ເນື່ອງ.
ທ່ານກົວເສີງຄຸນ, ທີ່ປຶກສາແຫ່ງລັດ, ທັງເປັນລັດຖະມົນຕີວ່າການກະຊວງປ້ອງກັນຄວາມສະຫງົບຈີນໄດ້ເຂົ້າຮ່ວມການພົບປະແລະຈັດການເຈລະຈາກັບທ່ານສົມແກ້ວ ສີລາວົງເຊິ່ງສອງຝ່າຍໄດ້ເຊັນເອກະສານຮ່ວມມືທີ່ກ່ຽວຂ້ອງ.