（ກອງປະຊຸມລັດຖະມົນຕີສຶກສາອາຊຽນຄັ້ງທີ8ຈັດຂຶ້ນຢູ່ນະຄອນຫຼວງວຽງຈັນ）
ຕາມຂ່າວCRI, ຕອນເຊົ້າວັນທີ11ກັນຍານີ້, ກອງປະຊຸມລັດຖະມົນຕີສຶກສາອາຊຽນຄັ້ງທີ8ໄດ້ຈັດຂຶ້ນຢູ່ນະຄອນຫຼວງວຽງຈັນ.
ໃນພິທີເປີດ, ທ່ານດຣ. ພັນຄຳ ວິພາວັນ, ຮອງນາຍົກລັດຖະມົນຕີ, ທັງເປັນລັດຖະມົນຕີວ່າການກະຊວງສຶກສາທິການແລະກິລາກ່າວວ່າ, ໃນກອງປະຊຸມຄັ້ງນີ້, ຈະໄດ້ທົບທວນຄືນກໍ່ຄືລາຍງານຄວາມຄືບໜ້າຂອງການຈັດຕັ້ງປະຕິບັດແຜນວຽກທີ່ຮັບຮອງເອົາໃນກອງປະຊຸມລັດຖະມົນຕີສຶກສາອາຊຽນຄັ້ງທີ7ຜ່ານມາ, ກຳນົດວິໄສທັດ, ທິດທາງແຜນການແລະການຈັດລຽງບູລິມະສິດຂອງການພັດທະນາການສຶກສາໃນກອບອາຊຽນພາຍຫຼັງປີ2015, ໂດຍສະເພາະແມ່ນແຜນພັດທະນາການສຶກສາໃນໄລະ5ປີ(2016-2020). ສະນັ້ນຈຶ່ງເວົ້າໄດ້ວ່າ, ກອງປະຊຸມຄັ້ງນີ້ເປັນກອງປະຊຸມທີ່ມີຄວາມໝາຍແລະຄວາມສຳຄັນຫຼາຍຕໍ່ວຽກງານການສຶກສາກໍ່ຄືການພັດທະນາຊັບພະຍາກອນມະນຸດສຳລັບບັນດາປະເທດອາຊຽນ, ກໍ່ເປັນນິມິດໝາຍອັນດີທີ່ຢືນຢັນເຖິງການເພີ່ມທະວີການຮ່ວມມືດ້ານການສຶກສາຂອງບັນດາປະເທດສະມາຊິກອາຊຽນ, ແນໃສ່ເພື່ອຫຼຸດຜ່ອນຊ່ອງຫວ່າງການພັດທະນາການສຶກສາລະຫວ່າງບັນດາປະເທດສະມາຊິກອາຊຽນດ້ວຍກັນ.
10ປະເທດສະມາຊິກອາຊຽນ, ຜູ້ຕາງໜ້າຈີນ, ຍີ່ປຸ່ນ, ສ.ເກົາຫຼີ, ປະເທດສະມາຊິກກອງປະຊຸມສຸດຍອດອາຊີຕາເວັນອອກ, ກອງເລຂາອາຊຽນ, ອົງການລັດຖະມົນຕີສຶກສາປອາຊຽນ, ແລະສະຫະພາບເອີລົບທີ່ເປັນຜູ້ສັງເກດການໄດ້ເຂົ້າຮ່ວມກອງປະຊຸມຄັ້ງນີ້.
