ວັນທີ 11 ກັນຍານີ້, ຢູ່ນະຄອນຫຼວງດູຊັນເບຂອງຕາຊີກີສະຖານ, ໄດ້ຈັດໃຫ້ມີການພົບປະເຈລະຈາລະຫວ່າງປະມຸກລັດ 3 ປະເທດຈີນ,ຣັດເຊຍແລະມົງໂກລີໂດຍມີທ່ານສີຈິ້ນຜິງ, ປະທານປະເທດຈີນ, ທ່ານວລາດີເມຍ ປູຕິນ, ປະທານາທິບໍດີຣັດເຊຍ, ທ່ານຕະຊັກຮ໌ຢາ ເອເບກດອກ, ປະທານາທິບໍດີມົງໂກລີເຂົ້າຮ່ວມ.
ທ່ານສີຈິ້ນຜິງກ່າວເນັ້ນວ່າ, ທັງ 3 ປະເທດຈີນ,ຣັດເຊຍແລະມົງໂກລີແມ່ນບ້ານໃກ້ເຮືອນຄຽງທີ່ດີແລະຄູ່ຮ່ວມມືທີ່ດີຕໍ່ກັນ. ພາຍໃຕ້ສະຖານະການສາກົນແລະພາກພື້ນທີ່ມີການປ່ຽນແປງແລະມີຄວາມສັບສົນຫຼາຍໃນປະຈຸບັນ, ປະມຸກລັດ 3 ປະເທດໄດ້ມີການພົບປະເຈລະຈາເປັນຄັ້ງທຳອິດ, ດຳເນີນການແລກປ່ຽນກ່ຽວກັບບັນຫາການຮ່ວມມືທີ່ສາມຝ່າຍສົນໃຈຮ່ວມກັນ, ສາມາດເພີ່ມທະວີຄວາມໄວ້ເນື້ອເຊື່ອໃຈກັນລະຫວ່າງ 3 ຝ່າຍ, ຊຸກຍູ້ການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ບັນລຸການຊ່ວຍຊູຍູ້ໜູນກັນໂດຍທ່າແຮງຂອງແຕ່ລະຝ່າຍ, ຮ່ວມກັນພັດທະນາ, ຊຸກຍູ້ຂະບວນການການຮ່ວມມືຂອງພາກພື້ນອາຊີຕາເວັນອອກສຽງເໜືອ, ເຊິ່ງສິ່ງທີ່ກ່າວມານັ້ນແລະມີຄວາມຈຳເປັນຫຼາຍ, ກໍ່ມີຄວາມໝາຍທີ່ສຳຄັນຫຼາຍ.
ທ່ານສີຈິ້ນຜິງຊີ້ອອກວ່າ, ຍຸດທະສາດດ້ານການພັດທະນາລະຫວ່າງ 3 ປະເທດມີຄວາມສອດຄ່ອງກັນໃນລະດັບສູງ. ຈີນສະເໜີຂໍ້ລິເລີ່ມເພື່ອຮ່ວມກັນສ້າງແລວທາງເສດຖະກິດຂອງເສັ້ນທາງສາຍໄໝ, ໄດ້ຮັບຄວາມຕອບຮັບທີ່ຕັ້ງໜ້າຈາກຝ່າຍຣັດເຊຍແລະຝ່າຍມົງໂກລີ.
ປະມຸກລັດຂອງ 3 ປະເທດດັ່ງກ່າວເຫັນວ່າ, ການພົບປະໃນຄັ້ງນີ້ມີຜົນປະໂຫຍດຫຼາຍ, ເຊິ່ງຕ່າງຝ່າຍຈະມອບໝາຍໃຫ້ພາກສ່ວນທີ່ກ່ຽວຂ້ອງຂອງ 3 ຝ່າຍຈັດຕັ້ງປະຕິບັດຄວາມເຫັນທີ່ເປັນເອກະສັນກັນລະຫວ່າງປະມຸກລັດຂອງ 3 ປະເທດ, ຄົ້ນຄວ້າຂໍ້ສະເໜີດ້ານການຮ່ວມມືທີ່ກ່ຽວຂ້ອງ, ເພື່ອລາຍງານສະພາບວຽກງານກັບປະມຸກລັດຂອງ 3 ປະເທດຢ່າງທັນການ. ສ້າງກົນໄກປຶກສາຫາລືຮ່ວມກັນລະດັບລັດຖະມົນຕີຊ່ວຍວ່າການກະຊວງການຕ່າງປະເທດແລະຮ່ວມກັນປະສານງານເພື່ອຊຸກຍູ້ການຮ່ວມມືລະຫວ່າງ 3 ປະເທດ.
