ວັນທີ 16 ກັນຍານີ້, ງານວາງສະແດງສິນຄ້າຈີນ-ອາຊຽນຄັ້ງທີ 11 ແລະກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 11 ຈະຈັດຂຶ້ນຢູ່ນະຄອນນານນິງ, ເຂດປົກຄອງຕົນເອງເຜົ່າຈວ້າງກວາງຊີຂອງຈີນ. ປັດຈຸບັນ, ວຽກງານກະກຽມໄດ້ສໍາເລັດແລ້ວ. ຕອນເຊົ້າວັນທີ 15 ກັນຍານີ້, ທ່ານຮູສົວຈິນ, ຮອງຫົວໜ້າຫ້ອງການຂ່າວກະຊວງການຄ້າຈີນ ແລະທ່ານນາງຢາງຢ້ຽນຢ້ຽນ, ຮອງເລຂາກອງເລຂາງານວາງສະແດງສິນຄ້າຈີນ-ອາຊຽນ ໄດ້ແນະນໍາສະພາບທີ່ກ່ຽວຂ້ອງຕໍ່ສື່ມວນຊົນ ເຊັ່ນວຽກງານຈັດຕັ້ງງານວາງສະແດງ, ກິດຈະກໍາສົ່ງເສີມການຄ້າແລະການລົງທຶນໃນໄລຍະຈັດງານວາງສະແດງ, ວຽກງານກະກຽມ ແລະອື່ນໆ.
ມາຮອດປັດຈຸບັນ, ຈໍານວນບ່ອນວາງສະແດງທີ່ວິສາຫະກິດປະເທດຕ່າງໆຮ້ອງຂໍມີ 6009 ບ່ອນ ເຊິ່ງໄດ້ລື່ນກາຍ 30% ຂອງຈໍານວນບ່ອນວາງສະແດງໃນແຜນການ, ວິສາຫະກິດທີ່ຈະເຂົ້າຮ່ວມງານວາງສະແດງຄັ້ງນີ້ມີ 2330 ແຫ່ງ, ບ່ອນວາງສະແດງທີ່ໄດ້ກໍານົດໃນແຜນການມີ 4600 ບ່ອນ, ໃນນັ້ນລວມມີບ່ອນວາງສະແດງສໍາລັບຕ່າງປະເທດທີ່ລວມທັງ 10 ປະເທດອາຊຽນ ຈໍານວນ 1259 ບ່ອນ, ຫວຽດນາມ, ອິນໂດເນເຊຍ, ລາວ, ມາເລເຊຍ, ມຽນມາ ແລະໄທຈະສືບຕໍ່ຈັບຈ່ອງແລະຮັບເໝົາຮ້ານວາງສະແດງ.