ເມື່ອບໍ່ດົນມານີ້, ໃນເວລາເຂົ້າຮ່ວມກອງປະຊຸມສຸດຍອດນັກວິສາຫະກິດຈີນ-ອາເມລິກາລາຕິນຕັ້ງທີ 8 ຢູ່ນະຄອນສາງຊ່າຂອງຈີນ, ທ່ານລຸອິສ ອານເບີໂຕ ໂມເຣໂນ, ຜູ້ອໍານວຍການທະນາຄານພັດທະນາທະວີບອາເມລິກາ ຫຼື IADB ກ່າວວ່າ, ສາມາດບັນລຸເປົ້າໝາຍທີ່ວາງໄວ້ໃນແຜນການການຮ່ວມມືຈີນ-ອາເມລິກາລາຕິນ ຄືຈະບັນລຸມູນຄ່າການຄ້າລະຫວ່າງສອງຝ່າຍເຖິງ 500 ຕື້ໂດລາໃນ 10 ປີຕໍ່ໜ້າ.
ທ່ານໂມເຣໂນເຫັນວ່າ, ໃນ 10 ປີທີ່ຜ່ານມາ, ການຄ້າຈີນ-ອາເມລິກາລາຕິນໄດ້ເຕີບໂຕໄວທີ່ສຸດ, ແຕ່ອາເມລິກາລາຕິນແລະເຂດກາຣີບີຍັງຈະສົ່ງອອກວັດຖຸດິບໄປຈີນເປັນຕົ້ນຕໍ ເຊິ່ງມີມູນຄ່າເພີ່ມບໍ່ສູງ, ສ່ວນຈີນສົ່ງອອກຜະລິດຕະພັນດ້ານອຸດສາຫະກໍາໄປອາເມລິກາລາຕິນເປັນຕົ້ນຕໍ. ຖ້າຢາກບັນລຸເປົ້າໝາຍພັດທະນາການຄ້າຈີນ-ອາເມລິກາລາຕິນໃນອະນາຄົດ, ກໍຕ້ອງເອົາໃຈໃສ່ການປ່ຽນແປງໂຄງປະກອບ, ສົ່ງເສີມການຄ້າທີ່ມີມູນຄ່າເພີ່ມສູງ. ຕາມສະຖິຕິແລ້ວ, ໃນປີກາຍນີ້, ຈີນໄດ້ກາຍເປັນປະເທດຄູ່ການຄ້າໃຫຍ່ອັນດັບ 2 ຂອງອາເມລິກາລາຕິນ ເຊິ່ງມູນຄ່າການຄ້າລະຫວ່າງຈີນ-ອາເມລິກາລາຕິນໄດ້ເພີ່ມຂຶ້ນເຖິງ 261 ຕື້ 600 ລ້ານໂດລາຈາກ 12 ຕື້ 600 ລ້ານໂດລາຂອງປີ 2000 ເຊິ່ງເປັນການເພີ່ມຂຶ້ນເກືອບ 21 ເທົ່າ.
