ຕາມຂ່າວ CRI ລາຍງານວ່າ, ວັນທີ 16 ກັນຍານີ້, ຫ້ອງການຖະແຫຼງຂ່າວກະຊວງການຄ້າຈີນໄດ້ແຈ້ງໃຫ້ຊາບວ່າ, ໃນວັນດຽວກັນ, ລັດຖະບານຈີນໄດ້ແຕ່ງຕັ້ງໜ່ວຍກວດພະຍາດຫ້ອງທົດລອງເຄື່ອນທີ່ຂອງສູນປ້ອງກັນແລະຄວບຄຸມພະຍາດຈີນເຊິ່ງປະກອບດ້ວຍ 59 ຄົນໃຫ້ເດີນທາງໄປເຊຣາລີໂອນເພື່ອດຳເນີນວຽກງານກວດພະຍາດໄຂ້ເລືອດອອກອີໂບລາ, ເພື່ອເພີ່ມຄວາມສາມາດໃນດ້ານການກວດພະຍາດຂອງຫ້ອງທົດລອງເຊຣາລີໂອນ. ໜ່ວຍກວດພະຍາດຫ້ອງທົດລອງຂອງຈີນຈະອີງໃສ່ໂຮງໝໍມິດຕະພາບຈີນ-ເຊຣາລີໂອນ ທີ່ລັດຖະບານຈີນເປັນຜູ້ຊ່ວຍເຫຼືອສ້າງຂຶ້ນນັ້ນເປັນສະຖານທີ່ເຮັດວຽກ ເພື່ອຊ່ວຍເຫຼືອເຊຣາລີໂອນດຳເນີນການກວດພະຍາດໃນຫ້ອງທົດລອງ, ເຝົ້າຕິດຕາມອາການຄົນປ່ວຍແລະວຽກງານດ້ານອື່ນໆອີກ.
ນັບແຕ່ປະເທດທີ່ກ່ຽວຂ້ອງຢູ່ອາຟຣິກກາຕາເວັນຕົກເກີດການລະບາດຂອງພະຍາດອີໂບລາເປັນຕົ້ນມາ, ຈີນໄດ້ມີພະນັກງານການແພດຈຳນວນ 115 ຄົນໄປສະໜັບສະໜູນແລະເຂົ້າຮ່ວມວຽກງານປ້ອງກັນແລະຄວບຄຸມພະຍາດຂອງປະເທດເຫຼົ່ານັ້ນຕາມລຳດັບ, ຖ້າບວກກັບພະນັກງານການແພດ 59 ຄົນທີ່ສົ່ງເພີ່ມໃໝ່ໃນເທື່ອນີ້, ຍອດຈຳນວນພະນັກງານການແພດຈະບັນລຸເຖິງ 174 ຄົນ.