ວັນທີ 16 ກັນຍານີ້, ທ່ານສີຈິ້ນຜິງ, ປະທານປະເທດຈີນໄດ້ສໍາເລັດການຢ້ຽມຢາມມານດິບທາງລັດຖະກິດ ແລະເດີນທາງໄປນະຄອນຫຼວງໂກລົມໂບຂອງສີລັງກາ ເພື່ອຢ້ຽມຢາມສີລັງກາທາງລັດຖະກິດ, ທ່ານອັບດູລາ ຢາມີນ, ປະທານາທິບໍດີມານດິບພ້ອມພັນລະຍາ ໄດ້ເດີນທາງໄປສະໜາມບິນເພື່ອສົ່ງທ່ານສີຈິ້ນຜິງ.
ທ່ານສີຈິ້ນຜິງກ່າວວ່າ, ໄມຕີຈິດມິດຕະພາບອັນເລິກເຊິ່ງຂອງປະຊາຊົນມານດິບຕໍ່ປະຊາຊົນຈີນ ໄດ້ສ້າງຄວາມປະທັບໃຈອັນດີງາມແລະເລິກເຊິ່ງຕໍ່ພວກຂ້າພະເຈົ້າ. ຂ້າພະເຈົ້າແລະທ່ານປະທານາທິບໍດີຢາມີນໄດ້ຕົກລົງກັນວ່າ, ຍົກລະດັບການພົວພັນຈີນ-ມານດິບເປັນການພົວພັນຄູ່ຮ່ວມມືທີ່ມີໄມຕີຈິດມິດຕະພາບຮອບດ້ານທີ່ປິ່ນໜ້າໄປສູ່ອະນາຄົດ, ພ້ອມດຽວກັນ, ພວກຂ້າພະເຈົ້າຍັງໄດ້ບັນລຸຄວາມເຫັນທີ່ເປັນເອກະສັນກັນຈໍານວນຫຼາຍກ່ຽວກັບການຮ່ວມມືຕົວຈິງລະຫວ່າງສອງປະເທດ. ຫວັງວ່າການພົວພັນສອງປະເທດຈະພັດທະນາກ້າວໄປຂ້າງໜ້າຢ່າງບໍ່ຢຸດຢັ້ງ.
ທ່ານຢາມີນກ່າວວ່າ, ຂໍ້ລິເລີ່ມຂອງທ່ານສີຈິ້ນຜິງກ່ຽວກັບການສ້າງເສັ້ນທາງສາຍໄໝທາງທະເລສະຕະວັດທີ 21 ຈະຮັດແໜ້ນການພົວພັນລະຫວ່າງປະເທດຕ່າງໆຢູ່ອາຊີ, ຝ່າຍມານດິບຍິນດີມີສ່ວນຮ່ວມຢ່າງຕັ້ງໜ້າ, ເພີ່ມທະວີການຮ່ວມມືລະຫວ່າງສອງປະເທດ ເພື່ອເຮັດໃຫ້ການພົວພັນມານດິບ-ຈີນກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ ບົນພື້ນຖານການພົວພັນທີ່ດີຂອງສອງປະເທດ.
