(ທ່ານຢາງເຈຊື ທີ່ປຶກສາແຫ່ງລັດຈີນພົບປະເຈລະຈາກັບທ່ານຈອນ ເຄຣີ ລັດຖະມົນຕີວ່າການກະຊວງການຕ່າງປະເທດອາເມລິກາຢູ່ນະຄອນໂບສຕັນແຫ່ງອາເມລິກາໃນວັນທີ 18 ຕຸລານີ້)
ຕາມຂ່າວ CRI: ວັນທີ 18 ຕຸລານີ້ ຢູ່ທີ່ນະຄອນໂບສຕັນແຫ່ງອາເມລິກາ, ທ່ານຢາງເຈຊື ທີ່ປຶກສາແຫ່ງລັດຈີນໄດ້ພົບປະເຈລະຈາກັບທ່ານຈອນ ເຄຣີ ລັດຖະມົນຕີວ່າການກະຊວງການຕ່າງປະເທດອາເມລິກາ, ສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບບັນຫາຕ່າງໆເຊັ່ນ: ການພົວພັນ ລະຫວ່າງຈີນ-ອາເມລິກາແບບໃໝ່, ແລະບັນຫາສາກົນແລະພາກພື້ນທີ່ໃຫ້ຄວາມສົນໃຈຮ່ວມກັນ.
ທ່ານຢາງເຈຊືກ່າວວ່າ, ຈີນຍິນດີຕ້ອນຮັບທ່ານປະທານາທິບໍດີບາຣັກ ໂອບາມາ ທີ່ຈະເດີນທາງໄປປະເທດຈີນເພື່ອເຂົ້າຮ່ວມກອງປະຊຸມບໍ່ເປັນທາງການຂອງຜູ້ນຳອົງການເອເປັກກໍ່ຄືຢ້ຽມຢາມປະເທດຈີນ, ສອງຝ່າຍຈີນກັບອາເມລິກາຄວນເພີ່ມທະວີການທຳຄວາມເຂົ້າໃຈກັນແລະປະສານງານກັນ, ເຮັດໃຫ້ກອງປະຊຸມບໍ່ເປັນທາງການຂອງຜູ້ນຳອົງການເອເປັກໄດ້ຮັບໝາກຜົນທີ່ຄາດໄວ້, ຊຸກຍູ້ຂະບວນວິວັດຫັນເປັນອັນໜຶ່ງອັນດຽວກັນຂອງພາກພື້ນ. ຈີນກັບອາເມລິກາຄວນເພີ່ມທະວີການຮ່ວມມືໃນວຽກງານອາຊີປາຊິຟິກ, ເພື່ອຊຸກຍູ້ພາກພື້ນແຫ່ງນີ້ມີສະເຖຍລະພາບແລະຄວາມຈະເລີນຮຸ່ງເຮືອງ.
ທ່ານເຄຣີກ່າວວ່າ, ຈ້ອງມອງເບິ່ງອະນາຄົດ, ອາເມລິກາກັບຈີນສາມາດຮ່ວມມືໃນຫຼາຍຂົງເຂດ. ອາເມລິກາຍິນດີຮ່ວມກັບຈີນເພີ່ມທະວີການແລກປ່ຽນ, ສົນທະນາແລະຮ່ວມມືກັນ, ກ້າວຂ້າມຄວາມເຫັນທີ່ຕ່າງກັນແລະຄວາມຂັດແຍ່ງກັນຕ່າງໆ, ເພື່ອເພີ່ມເນື້ອໃນໃໝ່ໃຫ້ແກ່ການພົວພັນລະຫວ່າງອາເມລິກາກັບຈີນແບບໃໝ່ເລື້ອຍໆ.
ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບການພົວພັນດ້ານເສດຖະກິດການຄ້າແລະການພົວພັນລະຫວ່າງສອງກອງທັບ, ການຮ່ວມມືກັນຮັບມືກັບການປ່ຽນແປງຂອງດິນຟ້າອາກາດ, ສະພາບພະຍາດອີໂບລາ ພ້ອມກັບບັນຫານິວເຄຼຍແຫຼມເກົາຫຼີ, ບັນຫານິວເຄຼຍອີຣານ, ບັນຫາອີຣັກ, ອາຟການີສະຖານແລະການຕ້ານການກໍ່ການຮ້າຍເປັນຕົ້ນ, ເຊິ່ງທ່ານຢາງເຈຊືໄດ້ບັນຍາຍຫຼັກໝັ້ນຫຼັກການຂອງຈີນກ່ຽວກັບບັນຫາເຫຼົ່ານີ້.
