ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນ ກ່າວໃນວັນທີ 19 ຕຸລານີ້ວ່າ: ທ່ານຢຽນຈິ້ນສີ, ຮອງປະທານສະພາປະຊາຊົນແຫ່ງຊາດ, ທູດພິເສດຂອງທ່ານສີຈິ້ນຜິງ, ປະທານປະເທດຈີນຈະເດີນທາງໄປອິນໂດເນເຊຍເພື່ອເຂົ້າຮ່ວມພິທີຂຶ້ນຮັບຕຳແໜ່ງຂອງທ່ານໂຈໂຄ ວີໂດໂດ ທີ່ໄດ້ຮັບເລືອກຕັ້ງເປັນປະທານາທິບໍດີອິນໂດເນເຊຍ ເຊິ່ງພິທີດັ່ງກ່າວຈະຈັດຂຶ້ນໃນວັນທີ 20 ຕຸລານີ້.
ເພື່ອຮັບປະກັນໃຫ້ພິທີສາບານຕົວຂຶ້ນຮັບຕຳແໜ່ງຂອງທ່ານໂຈໂຄ ສາມາດດຳເນີນໄປຢ່າງສະດວກ, ອິນໂດເນເຊຍຈະສົ່ງກຳລັງທະຫານແລະຕຳຫຼວດຈຳນວນ 30.000 ຄົນເປັນຢ່າງໜ້ອຍເພື່ອປະຕິບັດໜ້າທີ່ຮັກສາຄວາມປອດໄພ, ເຊິ່ງສະພາບການນີ້ບໍ່ເຄີຍມີມາກ່ອນໃນປະຫວັດສາດຂອງອິນໂດເນເຊຍ.
ທ່ານໂຈໂຄ ວີໂດໂດ ເກີດຢູ່ເມືອງໂຊໂລ ແຂວງຈາວາກາງເມື່ອປີ 1961, ກ່ອນເປັນນັກການເມືອງເຄີຍເປັນນັກທຸລະກິດດ້ານອະສັງຫາ ລິມະຊັບ ແລະ ເຟີນີເຈີ. ຮອດປີ 2005 ຈຶ່ງເຂົ້າຮ່ວມໃນວົງການການເມືອງ, ເຄີຍເປັນເຈົ້າຄອງເມືອງໂຊໂລ ແລະ ຫົວໜ້າເຂດພິເສດຈາກາຕາ. ວັນທີ 22 ກໍລະກົດ 2014, ຄະນະສະໝັກຮັບເລືອກຕັ້ງຂອງທ່ານໂຈໂຄ ວີໂດໂດ ແລະ ທ່ານຢູຊຸຟຄາລາ ໄດ້ຊະນະການເລືອກຕັ້ງດ້ວຍຄະແນນສຽງເຖິງ 53%, ແລະຈະດຳລົງຕຳແໜ່ງປະທານາທບໍດີ ແລະ ຮອງປະທານາທິບໍດີຊຸດໃໝ່ຂອງອິນໂດເນເຊຍ, ເຊິ່ງມີອາຍຸການໃນຕຳແໜ່ງເປັນເວລາ 5 ປີ.