ຕາມຂ່າວ CRI:ຫວ່າງມໍ່ໆມານີ້, ການເຕີບໂຕຂອງກຸ່ມຫົວຮຸນແຮງ IS ຢູ່ພາກຕາເວັນຕົກຂອງອີຣັກແລະພາກເໜືອຂອງຊີຣີໄດ້ກາຍເປັນຈຸດສຸມສາຍຕາຂອງທົ່ວໂລກອີກຄັ້ງໃໝ່.ໃນຮອບສອງເດືອນປາຍຜ່ານມາ,ສະຫະພັນສາກົນທີ່ລິເລີ່ມໂດຍອາເມລິກາໄດ້ດຳເນີນການໂຈມຕີທາງ ອາກາດ, ເຖິງແມ່ນວ່າກຸ່ມຫົວຮຸນແຮງ IS ໄດ້ຖືກໂຈມຕີໃນຂະໜາດໃດຂະໜາດໜຶ່ງແລ້ວກໍຕາມ, ແຕ່ການກະທຳຢູ່ສະໜາມຮົບບາງບ່ອນ ຍັງມີລັກສະນະແຂງແຮງຢູ່.
ວັນທີ 18 ຕຸລານີ້, ອົງການສັງເກດສິດທິມະນຸດຂອງຊີຣີທີ່ມີສຳນັກງານໃຫຍ່ຕັ້ງຢູ່ນະຄອນຫຼວງລອນດອນແຈ້ງວ່າ, ການໂຈມຕີທາງອາກາດ ຂອງອາເມລິກາຕໍ່ເຂດພາກຕາເວັນອອກແລະເຂດພາກເໜືອຂອງຊີຣີໃນມື້ດຽວກັນນັ້ນໄດ້ເຮັດໃຫ້ປະຊາຊົນ 5 ຄົນເສຍຊີວິດ.
ສຳລັບການເຄື່ອນໄຫວດ້ານການທະຫານຂອງກຸ່ມຫົວຮຸນແຮງ IS ຢູ່ອີຣັກແລະຊີຣີ, ວັນທີ 17 ຕຸລານີ້ຕາມເວລາທ້ອງຖິ່ນ, ສະພາຄວາມໝັ້ນຄົງອົງການສະຫະປະຊາຊາດໄດ້ອອກຖະແຫຼງການເພື່ອຮຽກຮ້ອງໃຫ້ເປີດກວ້າງການໂຈມຕີດ້ານການທະຫານຕໍ່ກຸ່ມຫົວຮຸນແຮງ IS. ຖະແຫຼງການສະບບັບນີ້ໄດ້ກ່າວເນັ້ນວ່າ, ປະຊາຄົມໂລກຕ້ອງເອົາຊະນະກຸ່ມ ISແລະກຳຈັດ"ຄວາມຄັບແຄບ, ຄວາມຮຸນແຮງແລະຄວາມຄຽດແຄ້ນ" ທີ່ກຸ່ມຫົວຮຸນແຮງດັ່ງກ່າວປຸກປັ່ນໃຫ້ເຖິງກົກເຖິງຮາກ.