ແຫຼ່ງຂ່າວຈາກຫ້ອງການທີ່ປຶກສາດ້ານເສດຖະກິດການຄ້າ ສະຖານທູດຈີນປະຈຳລາວລາຍງານວ່າ, ວັນທີ 16 ຕຸລານີ້ໄດ້ຈັດພິທີລົງນາມໃນບົດບັນທຶກກອງປະຊຸມສຳມະນາການສຳຫຼວດຄວາມເປັນໄປໄດ້ກ່ຽວກັບໂຄງການປ້ອງກັນແລະຄວບຄຸມການແຜ່ລະບາດພະຍາດໃນສັດຂ້າມຊາດຢູ່ກົມລ້ຽງສັດແລະການປະມົງ ກະຊວງກະສິກຳປ່າໄມ້ລາວ.
ໂຄງການຊ່ວຍເຫຼືອລາວປ້ອງກັນແລະຄວບຄຸມການແຜ່ລະບາດພະຍາດໃນສັດຂ້າມຊາດໄດ້ກຳນົດສະຖານທີ່ຕົ້ນຕໍຢູ່ນະຄອນຫຼວງວຽງຈັນ, ແຂວງຫຼວງນ້ຳທາ ແລະ ແຂວງຜົ້ງສາລີ, ໃນນັ້ນຈະສ້າງຫ້ອງທົດລອງວິເຄາະແລະບົ່ງມະຕິພະຍາດໃນສັດຂ້າມຊາດຢູ່ນະຄອນຫຼວງວຽງຈັນ, ແລະຈະສ້າງສະຖານີຕິດຕາມວິເຄາະພະຍາດໃນສັດຂ້າມຊາດຢູ່ແຂວງຫຼວງນ້ຳທາ ແລະ ແຂວງຜົ້ງສາລີ ແຂວງລະໜຶ່ງແຫ່ງ. ໂຄງການນີ້ຈະມີຜົນດີຕໍ່ການເພີ່ມທະວີການຮ່ວມມືດ້ານການປ້ອງກັນແລະຄວບຄຸມພະຍາດໃນສັດຕາມຊາຍແດນຈີນ-ລາວ, ທັງຊຸກຍູ້ການພົວພັນດ້ານເສດຖະກິດການຄ້າລະຫວ່າງສອງປະເທດຈີນ-ລາວໃຫ້ຂະຫຍາຍຕົວຢ່າງໝັ້ນທ່ຽງ.
