ນັບຕັ້ງແຕ່ພະຍາດເອດ ໄດ້ແຜ່ລະບາດເປັນຕົ້ນມາ, ເຮັດໃຫ້ຊາວໂລກຈຳນວນ 75 ລ້ານຄົນຕິດເຊື້ອພະຍາດນີ້, ປັດຈຸບັນ ຜູ້ຕິດເຊື້ອພະຍາດເອດ ແລະຜູ້ເປັນພະຍາດເອດທີ່ຍັງມີຊີວິດຢູ່ໃນທົ່ວໂລກມີ 35 ລ້ານກວ່າຄົນ, ພະຍາດເອດໄດ້ກາຍເປັນໜຶ່ງໃນສິ່ງທ້າທາຍດ້ານສາທາລະນະສຸກທີ່ຂ້ຽວຂາດທີ່ສຸດຂອງໂລກ. ປັດຈຸບັນ, ກອງປະຊຸມແລກປ່ຽນວິຊາການດ້ານພະຍາດເອດປະຈຳປີ 2014 ເຊິ່ງແມ່ນສະມາຄົມປ້ອງກັນແລະປິ່ນປົວພະຍາດຕິດຕໍ່ທາງເພດສຳພັນ ແລະ ພະຍາດເອດຈີນ ກຳລັງດຳເນີນຢູ່ທີ່ນະຄອນຫຼວງປັກກິ່ງ, ຜູ້ວາງນະໂຍບາຍແລະຜູ້ຊ່ຽວຊານລະດັບສຸດຍອດໃນຂົງເຂດພະຍາດເອດທີ່ມາຈາກປະເທດຕ່າງໆໃນໂລກຈຳນວນພັນກວ່າຄົນ ໄດ້ແລກປ່ຽນແລະປຶກສາຫາລືກັນກ່ຽວກັບການປ້ອງກັນແລະປິ່ນປົວພະຍາດເອດ.
ການທີ່ຄົ້ນພົບຜູ້ຕິດເຊື້ອພະຍາດເອດໂດຍໄວ ແມ່ນຂໍ້ສຳຄັນໃນການປ້ອງກັນແລະຄວບຄຸມພະຍາດນີ້. ປັດຈຸບັນ, ອັດຕາການຄົ້ນພົບຜູ້ຕິດເຊື້ອພະຍາດເອດຂອງຈີນກຳລັງເພີ່ມຂຶ້ນເປັນລຳດັບ, ເຊິ່ງຮອດທ້າຍປີນີ້ຈະບັນລຸ 60%. ອີງຕາມເປົ້າໝາຍຂອງອົງການສະຫະປະຊາຊາດເພື່ອວາງແຜນຕ້ານພະຍາດເອດ ຫຼື UNAIDS, ການຄົ້ນພົບຜູ້ຕິດເຊື້ອພະຍາດເອດຄວນບັນລຸ 90% ຂຶ້ນໄປ.
ໃນດ້ານການປ້ອງກັນແລະຄວບຄຸມພະຍາດເອດ, ປັດຈຸບັນ, ພະຍາດເອດແມ່ນສາມາດຄວບຄຸມໄວ້ໄດ້, ແຕ່ບໍ່ສາມາດປິ່ນປົວໃຫ້ຫາຍໄດ້. ວັກແຊງພະຍາດເອດທີ່ວິຊາການຈີນຄົ້ນຄວ້າຜະລິດເອງ ໄດ້ຖືກຖືເປັນໜຶ່ງໃນວັກແຊງປ້ອງກັນພະຍາດເອດ 8 ຢ່າງທີ່ມີຄວາມເປັນໄປໄດ້ສູງທີ່ສຸດທີ່ອາດຈະປະສົບຜົນສຳເລັດໃນໂລກ. ປັດຈຸບັນນີ້, ການປິ່ນປົວທົດລອງໄລຍະທີສອງໄດ້ສິ້ນສຸດລົງແລ້ວ, ແລະກຳລັງກວດສອບປະສິດທິພາບຂອງວັກແຊງຢູ່.
ກອງປະຊຸມແລກປ່ຽນວິຊາການດ້ານພະຍາດເອດປະຈຳປີ 2014 ດຳເນີນເປັນເວລາ 2 ວັນ. ທ່ານນາງເຜິງລີຢວນ, ທູດພິເສດການປ້ອງກັນແລະປິ່ນປົວວັນນະໂລກ ແລະ ພະຍາດເອດຂອງອົງການອະນາໄມໂລກ ຫຼື WTO, ພັນລະຍາຂອງທ່ານສີຈິ້ນຜິງ, ປະທານປະເທດຈີນ ໄດ້ເຂົ້າຮ່ວມພິທີໄຂກອງປະຊຸມດັ່ງກ່າວ.