ວັນທີ 20 ຕຸລານີ້ຢູ່ທີ່ນະຄອນຫຼວງປາຣີ, ວິທະຍຸກະຈາຍສຽງພາສາຈີນເອີຣົບທີ່ເປັນວິທະຍຸພາສາຈີນແຫ່ງທຳອິດຂອງຝຣັ່ງໄດ້ເລີ່ມອອກ ອາກາດຢ່າງເປັນທາງການ, ເຊິ່ງນີ້ເປັນວິທະຍຸພາສາຈີນ-ພາສາຝຣັ່ງທີ່ກະຈາຍສຽງແບບເຕັມເວລາແຫ່ງທຳອິດຂອງທະວີບເອີຣົບ.
ວິທະຍຸກະຈາຍສຽງພາສາຈີນເອີຣົບແມ່ນລິເລີ່ມໂດຍການຮິບໂຮມເງິນທຶນຂອງຊາວຈີນຕ່າງດ້າວທີ່ຢູ່ຝຣັ່ງແລະຊາວຝຣັ່ງເຊື້ອສາຍຈີນບາງຄົນ, ແລະເລີ່ມການຫ້າງຫາການກໍ່ສ້າງແລະການສະເໜີສ້າງຕັ້ງໃນປີ 2005, ເຊິ່ງໄດ້ຮັບການອະນຸມັດຈາກຄະນະກຳມະການຄວບຄຸມການກະຈາຍສຽງສູງສຸດຂອງຝຣັ່ງໃນປີ 2009. ວິທະຍຸດັ່ງກ່າວນີ້ຈະສາມາດກະຈາຍສຽງໂດຍປົກຫຸ້ມພາກພື້ນປາຣີໄດ້.
ທ່ານ ລິນຈິງຜິງ ຫົວໜ້າວິທະຍຸກະຈາຍສຽງພາສາຈີນເອີຣົບກ່າວວ່າ, ຫວັງຢາກໃຫ້ຊາວຈີນຕ່າງດ້າວແລະຊາວຝຣັ່ງເຊື້ອສາຍຈີນທີ່ຢູ່ຝຣັ່ງ ຮຽນຮູ້ກົດໝາຍຂໍ້ກຳນົດຂອງອຳນາດການປົກຄອງທ້ອງຖິ່ນ, ເຊື່ອມໂຍງເຂົ້າກັບສັງຄົມຝຣັ່ງໃນທຸກລະດັບຢ່າງແທ້ຈິງ ໂດຍຜ່ານວິທະຍຸດັ່ງກ່າວນີ້. ໃນຂະນະດຽວກັນນີ້, ໃນເວລາດຳເນີນລາຍການຍັງຈະແນະນຳສະພາບການແຫ່ງການສ້າງສາພັດທະນາທີ່ນັບມື້ນັບມີການປ່ຽນແປງຂອງປະເທດຈີນໃນຫຼາຍແງ່ຫຼາຍມູມເພື່ອເຮັດໃຫ້ຊາວຈີນທີ່ຢູ່ຕ່າງແດນໄດ້ມີການຕິດຕາມຂ່າວສານຂອງບ້ານເກີດຢ່າງໃກ້ຊິດກວ່າເກົ່າ.