ຕອນເຊົ້າວັນທີ 22 ຕຸລານີ້ຕາມເວລາທ້ອງຖິ່ນ, ຢູ່ໃນຫໍລັດຖະສະພາກໍ່ຄືຢູ່ອະນຸສາວະລີສົງຄາມທີ່ໃກ້ກັບຫໍທີ່ນະຄອນຫຼວງອົດຕາວາຂອງການາດາໄດ້ເກີດເຫດຍິງຄົນເສຍຊີວິດ 2 ຄັ້ງ, ເຮັດໃຫ້ມີ 2 ຄົນເສຍຊີວິດ, ຊຶ່ງໃນນັ້ນລວມທັງມືປືນ ແລະອີກ 2 ຄົນໄດ້ຮັບບາດເຈັບ, ເຊິ່ງເຫດການດັ່ງກ່າວນີ້ໄດ້ສ້າງຄວາມສະເທືອນໃຈແກ່ປະຊາຊົນການາດາທົ່ວປະເທດ.
ໃນເວລາ 10 ໂມງຂອງວັນທີ 22 ຕຸລານີ້ຕາມເວລາທ້ອງຖິ່ນ, ຢູ່ໃນຫໍລັດຖະສະພາສະຫະພັນການາດາໄດ້ມີສຽງຍິງປືນ 10 ກວ່ານັດດັງຂຶ້ນ. ຕາມຂ່າວແຈ້ງວ່າ, ມີຜູ້ຊາຍຜູ້ໜຶ່ງໄດ້ຖືປືນແລ່ນເຂົ້າໃນຫໍລັດຖະສະພາແລະຍິງໃສ່ຜູ້ຄົນແລະສຸດທ້າຍມືປືນຜູ້ນີ້ກໍ່ໄດ້ຖືກຍິງຕາຍ. ກ່ອນໜ້ານີ້, ຢູ່ອະນຸສາວະລີສົງຄາມທີ່ໃກ້ກັບຫໍລັດຖະສະພາຍັງໄດ້ເກີດເຫດຍິງຄົນເສຍຊີວິດລາຍໜຶ່ງ, ທະຫານທີ່ຢູ່ຍາມເພື່ອປ້ອງກັນຂຸມສົບຜູ້ເສຍສະຫຼະນິລະນາມເພື່ອການປະຕິວັດຜູ້ໜຶ່ງໄດ້ຖືກມືປືນຫຼອນໂຈມຕີ, ເຊິ່ງໄດ້ຖືກຍິງຫຼາຍນັດ, ໄດ້ຮັບການສົ່ງໄປປິ່ນປົວຢູ່ໂຮງໝໍແຕ່ໄດ້ເສຍຊີວິດໃນເວລາຕໍ່ມາ. ນອກນີ້, ຍັງມີປະຊາຊົນອີກສອງຄົນໄດ້ຮັບບາດເຈັບ, ແຕ່ປະຈຸບັນສອງຄົນທີ່ບາດເຈັບນີ້ໄດ້ພົ້ນຂີດມີຄວາມອັນຕະລາຍແລ້ວ. ປະຈຸບັນກໍ່ຍັງບໍ່ຮູ້ລາຍລະອຽດວ່າມືປືນທີ່ຍິງຄົນເສຍຊີວິດ 2 ລາຍດັ່ງກ່າວແມ່ນຜູ້ດຽວຫຼືບໍ່, ແລະມືປືນຍັງມີຜູ້ຮ່ວມກໍ່ເຫດນຳຫຼືບໍ່, ແຕ່ເຈົ້າໜ້າທີ່ຕຳຫຼວດອົດຕາວາໄດ້ເຕືອນໃຫ້ປະຊາຊົນຈົ່ງມີສະຕິລະວັງຕົວ.