ຕາມຂ່າວ cri: ວັນທີ24 ຕຸລານີ້, ໃນເວລາພົບປະທ່ານຈາຄາຢາ ມຣິສເວດ ປະທານາທິບໍດີຕັງຊານີຢູ່ປັກກິ່ງ, ທ່ານສີຈີ້ນພິງ ປະທານປະເທດຈີນກ່າວວ່າ, ລັດຖະບານຈີນຈະໃຫ້ການຊ່ອຍເຫຼືອຮອບທີ 4 ໃຫ້ປະເທດອາຟຼິກາຕາເວັນຕົກເພື່ອຕ້ານພະຍາດອີໂບລາ.
ທ່ານສີຈີ້ນພິງຊີ້ອອກວ່າ, ພະຍາດອີໂບລາຂອງເຂດອາຟຼິກາຕາເວັນຕົກສືບຕໍ່ແຜ່ລະບາຍ, ລັດຖະບານແລະປະຊາຊົນຈີນເຫັນອົກເຫັນໃຈຕໍ່ສະພາບການທີ່ປະເທດແລະປະຊາຊົນຂອງເຂດປະສົບພະຍາດ. ໂດຍພິຈາລະນາເຖິງສະພາບພະຍາດອີໂບລາແລະຄວາມຕ້ອງການຂອງປະເທດເຂດເກີດພະຍາດໃນປັດຈຸລັນ, ລັດຖະບານຈີນຕົກລົງເລີ່ມການຊ່ອຍເຫຼືອດ່ວນຮອບທີ 4, ຈະສະໜອງວັດຖຸຕ້ອງການດ່ວນແລະການຊ່ອຍເຫຼືອເງິນສົດທີ່ມີມູນຄ່າ 500 ລ້ານຢວນໃຫ້ 3 ປະເທດຄືລີເບຣີ, ເຊຣາຣີໂອນແລະກີເນແລະອົງການຈັດຕັ້ງສາກົນທີ່ກ່ຽວຂ້ອງ, ສົ່ງຜູ່ຊ່ຽວຊານຕ້ານພະຍາດແລະພະນັກງານພະຍາບານຈີນໄປເຂດເກີດພະຍາດຫຼາຍກວ່າເກົ່າ, ແລະຊ່ອຍລີເບຣີສ້າງສູນການປິ່ນປົວແຫ່ງໜຶ່ງ. ຝ່າຍຈີນຍັງຍິນດີຕັ້ງໜ້າດຳເນີນການຮ່ວມມືກັບປະຊາຄົມໂລກ, ຊ່ອຍເຫຼືອປະເທດເຂດເກີດພະຍາດເອົາຊະນະພະຍາດອີໂບລາໂດຍໄວ.
