ວັນທີ 30 ຕຸລານີ້ຢູ່ທີ່ນະຄອນຫຼວງປັກກິ່ງ, ທ່ານນາງສິວຢວນຜິງ, ຫົວໜ້າຫ້ອງການວຽກງານຊາວຈີນຕ່າງດ້າວຂອງລັດຖະບານຈີນໄດ້ພົບປະທ່ານໂພຄິນ ພົນລະກຸນ, ປະທານສະມາຄົມວັດທະນະທຳເສດຖະກິດຈີນ-ໄທພ້ອມດ້ວຍຄະນະ, ສອງຝ່າຍໄດ້ແລກປ່ຽນຢ່າງເລິກເຊິ່ງກ່ຽວກັບທິດທາງຂອງການຮ່ວມມືໃນການພັດທະນາການສຶກສາດ້ານພາສາຈີນຢູ່ຕ່າງປະເທດ.
ໂອກາດນີ້, ທ່ານນາງສິວຢວນຜິງ ໄດ້ຊີ້ອອກວ່າ, ໃນຫຼາຍປີຜ່ານມານີ້, ສະມາຄົມວັດທະນະທຳເສດຖະກິດຈີນ-ໄທ ໄດ້ປະກອບສ່ວນອັນພົ້ນເດັ່ນເຂົ້າໃນວຽກງານການສຶກສາດ້ານພາສາຈີນຂອງໄທ ກໍຄືທົ່ວພາກພື້ນອາຊຽນ, ເຊິ່ງນາງສິວຢວນຜິງກໍໄດ້ສະແດງຄວາມຍ້ອງຍໍຊົມເຊີຍຕໍ່ເລື່ອງນີ້. ນັບແຕ່ປີ 2005 ເປັນຕົ້ນມາ, ພາຍໃຕ້ການສະໜັບສະໜູນຢ່າງແຂງແຮງຈາກສະມາຄົມວັດທະນະທຳເສດຖະກິດຈີນ-ໄທ, ຫ້ອງການວຽກງານຊາວຈີນຕ່າງດ້າວຂອງລັດຖະບານຈີນ ແລະ ສະມາຄົມແລກປ່ຽນກັບຕ່າງປະເທດຈີນ ໄດ້ເລີ່ມດຳເນີນໂຄງການ "ຊຸດອົບຮົມພາສາຈີນສຳລັບນາຍທະຫານກະຊວງປ້ອງກັນປະເທດໄທ". ໃນ 10 ປີຜ່ານມານີ້, ພາຍໃຕ້ຄວາມພະຍາຍາມຮ່ວມກັນຂອງສອງຝ່າຍ, ໂຄງການນີ້ບໍ່ພຽງແຕ່ໄດ້ຮັບການຍົກລະດັບໃຫ້ສູງຂຶ້ນເປັນກ້າວໆເທົ່ານັ້ນ, ຂະໜາດຂອງໂຄງການກໍໄດ້ຂະຫຍາຍກວ້າງອອກ ຄື ຈາກຊຸດອົບຮົມທຳອິດທີ່ມີສຳມະນາກອນຈຳນວນ 17 ຄົນເພີ່ມຂຶ້ນເປັນຮ້ອຍກວ່າຄົນຕໍ່ປີ. ມາຮອດປັດຈຸບັນ, ຊຸດອົບຮົມດັ່ງກ່າວໄດ້ຈັດຂຶ້ນຢ່າງໄດ້ຮັບຜົນສຳເລັດ 9 ຊຸດແລ້ວ, ນັບລວມແລ້ວໄດ້ອົບຮົມສ້າງບຸກຄະລາກອນດ້ານພາສາຈີນລະດັບສູງຈຳນວນ 482 ຄົນ.
