ວັນທີ 31 ຕຸລານີ້, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດຂອງຂະບວນການອິສຕານບູນກ່ຽວກັບບັນຫາອັຟການີສະຖານທີ່ຈັດຂຶ້ນຢູ່ນະຄອນຫຼວງປັກກິ່ງຂອງຈີນ, ຢູ່ທີ່ປະຊຸມ, ທ່ານຫວາງຢີ້ກ່າວເນັ້ນວ່າ, ຝ່າຍຕ່າງໆທີ່ກ່ຽວຂ້ອງຄວນຮ່ວມມືກັນໃນການໃຊ້ມາດຕະການເພື່ອສ້າງຄວາມໄວ້ເນື້ອເຊື່ອໃຈກັນໃນຂົງເຂດຕ່າງໆຂອງຂະບວນການອິສຕານບູນໂດຍໄວ, ເພື່ອຊ່ວຍອັຟການີສະຖານເພີ່ມທະວີການສ້າງຄວາມສາມາດຂອງຕົນ.
ທ່ານຫວາງຢີ້ກ່າວວ່າ, ໃນຂະບວນການຂ້າມຜ່ານຂອງອັຟການີສະຖານ, ມີວຽກງານໃນສອງດ້ານມີຄວາມສຳຄັນທີ່ສຸດຄື: ໜຶ່ງ ເລັ່ງລັດບັນລຸຄວາມປອງດອງກັນທາງການເມືອງ. ສອງ ເພີ່ມທະວີການສ້າງຄວາມສາມາດຂອງຕົນ. ທ່ານຫວາງຢີ້ກ່າວຕື່ມວ່າ, ຜູ້ນຳຂອງຈີນໄດ້ປະກາດແຜນການຕ່າງໆກ່ຽວກັບການຊ່ວຍເຫຼືອແລະອົບຮົມແກ່ອັຟການີສະຖານແລ້ວ. ຈີນຈະຈັດຕັ້ງປະຕິບັດແຜນການເຫຼົ່ານີ້ຢ່າງແທ້ຈິງ, ແລະຈະສືບຕໍ່ຮ່ວມກັບອັຟການີສະຖານດຳເນີນການຮ່ວມມືໃນຫຼາຍຂົງເຂດອື່ນໆທີ່ກ່ຽວພັນເຖິງເສດຖະກິດແຫ່ງຊາດແລະຊີວິດການເປັນຢູ່ຂອງປະຊາຊົນຂອງອັຟການີສະຖານ, ເພື່ອຊ່ວຍເຫຼືອອັຟການີສະຖານສ້າງຄວາມສາມາດຂອງຕົນ, ເຊິ່ງເປັນປະໂຫຍດຕໍ່ການພັດທະນາແບບຍືນຍົງຂອງອັຟການີສະຖານ.
 |
