ວັນທີ 31 ຕຸລາແລ້ວນີ້, ມຽນມາໄດ້ຈັດການພົບປະ ໂຕະມົນສຸດຍອດ 5 ຝ່າຍ ຄື ຜູ້ຕາງໜ້າຂອງລັດຖະບານ, ລັດຖະສະພາ, ກອງທັບ, ຄະນະກຳມະການເລືອກຕັ້ງແຫ່ງຊາດ ແລະ ຜູ້ຕາງໜ້າຂອງພັກການເມືອງທີ່ສຳຄັນຂອງມຽນມາເປັນຄັ້ງທຳອິດ, ໂດຍມີຈຸດປະສົງເພື່ອຊຸກຍູ້ຂະບວນການປອງດອງຊາດ ແລະ ຂະບວນການສັນຕິພາບແລະປະຊາປະທິປະໄຕພາຍໃນປະເທດມຽນມາ.
ຜ່ານການພົບປະກັນທີ່ບໍ່ເປີດເຜີຍຕໍ່ພາຍນອກເປັນເວລາ 2 ຊົ່ວໂມງ, ທ່ານເຢຕຸດ, ໂຄສົກປະທານາທິບໍດີມຽນມາໄດ້ຈັດກອງປະຊຸມຂ່າວ ໂດຍກ່າວວ່າ: ບັນດາຝ່າຍທີ່ເຂົ້າຮ່ວມກອງປະຊຸມພົບປະຄັ້ງນີ້ລ້ວນແຕ່ເຫັນວ່າ, ການບັນລຸຄວາມປອງດອງຊາດແລະສັນຕິພາບພາຍໃນປະເທດມີຄວາມສຳຄັນເປັນຢ່າງຍິ່ງຕໍ່ການພັດທະນາຂອງມຽນມາ, ຝ່າຍຕ່າງໆກໍເຫັນດີແກ້ໄຂບັນຫາການເມືອງດ້ວຍວິທີການເມືອງ, ປັບປຸງລັດຖະທຳມະນູນໂດຍຜ່ານລັດຖະສະພາ.
ກອງປະຊຸມພົບປະໂຕມົນຄັ້ງນີ້ໄດ້ຈັດຂຶ້ນຢູ່ທຳນຽບປະທານາທິບໍດີໂດຍຕອບສະໜອງຕາມຄຳເຊີນຂອງທ່ານເທນເຊນ, ປະທານາທິບໍດີມຽນມາ. ເຂົ້າຮ່ວມການພົບປະຄັ້ງນີ້ມີທ່ານປະທາ ນາທິບໍດີ ເທນເຊນ, ຮອງປະທານາທິບໍດີສອງທ່ານ ຄື ທ່ານໄຊມົກຄຳ ແລະ ທ່ານນຽນຕຸນ, ທ່ານນາງອອງຊານຊູຈີ, ປະທານພັກສັນນິບາດແຫ່ງຊາດເພື່ອປະຊາທິປະໄຕມຽນມາ ຫຼື NLD, ຜູ້ຕາງໜ້າພັກສາມັກຄີແຫ່ງຊາດ ແລະ ຜູ້ຕາງໜ້າພັນທະມິດພັກການເມືອງຊົນເຜົ່າສ່ວນໜ້ອຍອື່ນໆຂອງມຽນມາ ລວມທັງ 14 ຄົນ.
