ທູດພິເສດ UN ຮຽກຮ້ອງໃຫ້ປະຊາຄົມໂລກພະຍາຍາມຕໍ່ຕ້ານເຊື້ອໄວຣັດອີໂບລາຢ່າງຕໍ່ເນື່ອງ
2014-11-01 15:26:02 cri
ວັນທີ 31 ຕຸລາແລ້ວນີ້, ທ່ານເດວິດ ນາບາໂຣ, ທູດພິເສດກ່ຽວກັບບັນຫາເຊື້ອໄວຣັດອີໂບລາຂອງອົງການສະຫະປະຊາຊາດຫຼື UN ກ່າວວ່າ, ເຖິງວ່າຢູ່ບາງເຂດໄດ້ປາກົດມີສະພາບການແຜ່ລະບາດຂອງພະຍາດທີ່ຜ່ອນຄາຍລົງກໍ່ຕາມ, ແຕ່ບໍ່ສາມາດລະເຫຼີງສະຕິຢ່າງເດັດຂາດ, ປະຊາຄົມໂລກຄວນທຳຄວາມພະຍາຍາມຢ່າງຕໍ່ເນື່ອງເພື່ອຄວບຄຸມສະພາບການແຜ່ລະບາດຂອງເຊື້ອພະຍາດໄດ້ໃນທີ່ສຸດ. ພ້ອມດຽວກັນນັ້ນ, ຈີນຈະສ້າງຫ້ອງທົດລອງຄວາມປອດໄພຊີວະພາບແບບຄົງທີ່ຢູ່ເຊຣາລີໂອນເພື່ອຊ່ວຍປະເທດນີ້ປັບປຸງລະບົບສາທາລະນະສຸກໃຫ້ດີຂຶ້ນ, ເພີ່ມທະວີຄວາມສາມາດໃນການປ້ອງກັນແລະຄວບຄຸມພະຍາດລະບາດ. ທ່ານໄຄຟາລາ ມາຣາຮ໌, ລັດຖະມົນຕີວ່າການກະຊວງການຕ່າງປະເທດແລະການຮ່ວມມືສາກົນເຊຣາລີໂອນໄດ້ສະແດງຄວາມຍ້ອງຍໍສັນລະເສີນຕໍ່ຈີນທີ່ໃຫ້ການຊ່ວຍເຫຼືອຊຶ່ງໄດ້ສະແດງໃຫ້ເຫັນເຖິງຄວາມເອົາໃຈໃສ່ຢ່າງສູງຂອງຈີນຕໍ່ການພົວພັນລະຫວ່າງສອງຝ່າຍ. ຫ້ອງທົດລອງຄວາມປອດໄພຊີວະພາບແບບຄົງທີ່ທີ່ຈີນຈະຊ່ວຍເຫຼືອກໍ່ສ້າງນັ້ນ, ຈະມີຜົນດີຕໍ່ການປັບປຸງການສ້າງຄວາມສາມາດໃນຂົງເຂດສາທາລະນະສຸກໃຫ້ດີຂຶ້ນ, ເພີ່ມທະວີຄວາມສາມາດຂອງເຊຣາລີໂອນໃນການຮັບມືກັບການແຜ່ລະບາດຂອງເຊື້ອພະຍາດ.
