ວັນທີ 21 ພະຈິກນີ້, ພາຍໃຕ້ການເປັນເພື່ອນຮ່ວມທາງຂອງທ່ານຈອນ ຟີລິບ ຄີ ນາຍົກລັດຖະມົນຕີນູແວັນເຊລັງ, ທ່ານສີຈິ້ນຜິງ ປະທານປະເທດຈີນໄດ້ຢ້ຽມຊົມງານວາງສະແດງເຕັກນິກກະສິກຳແລະການລ້ຽງສັດນູແວັນເຊລັງ ແລະຫວັງວ່າສອງປະເທດຈະເພີ່ມທະວີການຮ່ວມມືໃນຂົງເຂດກະສິກຳແລະການລ້ຽງສັດ.
ທ່ານສີຈິ້ນຜິງຊີ້ໃຫ້ເຫັນວ່າ, ຂະແໜງການກະສິກຳແລະການລ້ຽງສັດເປັນສ່ວນປະກອບສຳຄັນຂອງການຮ່ວມມືລະຫວ່າງຈີນກັບນູແວັນເຊລັງ. ຂະແໜງການກະສິກຳແລະການລ້ຽງສັດຂອງນູແວັນເຊລັງມີຊື່ສຽງໂດ່ງດັງໃນໂລກ, ຈີນມີຕະຫຼາດບໍລິໂພກອັນກວ້າງໃຫຍ່. ວິສາຫະກິດຈີນລົງທຶນໃນຂະແໜງການກະສິກຳແລະການລ້ຽງສັດຢູ່ນູແວັນເຊລັງ ເຊິ່ງຈະຊ່ວຍຊຸກຍູ້ໃຫ້ການປະກອບອາຊີບແລະການເຕີບໂຕດ້ານເສດຖະ ກິດຂອງນູແວັນເຊລັງ, ຜະລິດຕະພັນກະສິກຳທີ່ຜະລິດອອກມານັ້ນກໍແມ່ນເພື່ອຂາຍໃຫ້ຜູ້ບໍລິໂພກຈີນຈຳນວນຫຼວງຫຼາຍ. ຫວັງວ່າວິສາຫະ ກິດຂອງສອງປະເທດຈະເພີ່ມທະວີການຮ່ວມມືເພື່ອບັນລຸໃຫ້ຕ່າງຝ່າຍຕ່າງມີຜົນປະໂຫຍດ.
ທ່ານສີຈິ້ນຜິງແລະທ່ານຈອນ ຟີລິບ ຄີ ຍັງໄດ້ຮ່ວມກັນເປັນສັກຂີພິຍານໃຫ້ແກ່ການແລກປ່ຽນສັນຍາຮ່ວມມືລະຫວ່າງຫຼາຍວິສາຫະກິດຂອງສອງປະເທດ ເຊິ່ງສັນຍາເຫຼົ່ານີ້ໄດ້ກ່ຽວພັນເຖິງການທະນາຄານ, ຜະລິດຕະພັນນົມ, ການບິນພົນລະເຮືອນ, ການສື່ສານໂທລະຄົມແລະອື່ນໆ.