ວັນທີ 22 ພະຈິກນີ້, ເມື່ອປຶກສາຫາລືເຖິງບັນຫາຄວາມໝັ້ນຄົງທາງທະເລໃນພາກພື້ນ, ບັນດາຜູ້ແທນທີ່ເຂົ້າຮ່ວມເວທີປຶກສາຫາລືຊຽງຊັນຄັ້ງທີ 5 ທີ່ຈັດຂຶ້ນຢູ່ນະຄອນຫຼວງປັກກິ່ງນັ້ນ, ຕ່າງກໍໄດ້ມີຄວາມເຫັນວ່າ, ປະເທດຕ່າງໆຄວນເພີ່ມທະວີການແລກປ່ຽນແລະການຮ່ວມມື, ເພີ່ມຄວາມໄວ້ເນື້ອເຊື່ອໃຈເຊິ່ງກັນແລະກັນຢ່າງບໍ່ຢຸດຢັ້ງ, ຄວນຈະແກ້ໄຂບັນຫາຄວາມໝັ້ນຄົງທາງທະເລຢ່າງມີປະສິດທິຜົນໂດຍຜ່ານການຮ່ວມກັນຄວບຄຸມຂໍ້ຂັດແຍ້ງ.
ທ່ານມູສຕາປາ ສິຣັດ, ລັດຖະມົນຕີຊ່ວຍວ່າການກະຊວງປ້ອງກັນປະເທດບຣູໄນກ່າວວ່າ, ການເພີ່ມທະວີການຮ່ວມມືແລະຮ່ວມກັນຮັບມືກັບບັນຫາຄວາມໝັ້ນຄົງທາງທະເລເຫຼົ່ານີ້, ຄວນເປັນທິດທາງທີ່ບັນດາປະເທດຕ້ອງຮ່ວມກັນທຳຄວາມພະຍາຍາມ, ເຊິ່ງປະເທດຕ່າງໆ ຄວນເພີ່ມທະວີການຮ່ວມມືໃນຂົງເຂດດ້ານການເມືອງ, ການທະຫານ, ຄວາມໝັ້ນຄົງແລະຂົງເຂດອື່ນໆເຊັ່ນ, ການເຊັນສັນຍາໄມຕີຈິດມິດຕະພາບລະຫວ່າງສອງຝ່າຍ, ການຈັດຕັ້ງການຊ້ອມຮົບຮ່ວມ ແລະການຝຶກຊ້ອມຮ່ວມແລະອື່ນໆ.
ທ່ານຣາວ ເດວ ຣາສາຣິໂອ ຮອງຫົວໜ້າກົມເສນາທິການກອງທັບຟິລິບປິນກ່າວວ່າ, ການວາງກົດແຫ່ງການປະພຶດຫຼືບັນທັດຖານທາງດ້ານກົດຫມາຍທີ່ທຸກຝ່າຍລ້ວນແຕ່ສາມາດຮັບເອົາໄດ້ນັ້ນມີຄວາມໝາຍສຳຄັນຢ່າງຍິ່ງຕໍ່ການຮັບມືກັບໄພຂົ່ມຂູ່ຈາກບັນຫາຄວາມໝັ້ນຄົງທາງທະເລຢ່າງຢ່າງມີປະສິດທິຜົນ.
ທ່ານໂຫຼຢວນ ຮອງເລຂາທິການສະມາຄົມວິທະຍາສາດການທະຫານຈີນ ກ່າວວ່າ, ການຮ່ວມກັນຄວບຄຸມຂໍ້ຂັດແຍ້ງນັ້ນມີຄວາມໝາຍອັນຕັ້ງໜ້າຕໍ່ການແກ້ໄຂບັນຫາທີ່ກ່ຽວ ຂ້ອງຢ່າງເໝາະສົມ, ເຊິ່ງເມື່ອປະເທດທີ່ກ່ຽວຂ້ອງມີບັນຫາຄວາມຂັດແຍ້ງກັນແລ້ວ, ກໍສາມາດສະກັດກັ້ນບໍ່ໃຫ້ບັນຫາເພີ່ມລະດັບຄວາມຮູນແຮງຂຶ້ນຈົນກາຍເປັນການປະທະກັນ.