ຫຼັງຈາກໄດ້ເຂົ້າຮ່ວມກອງປະຊຸມສຸດຍຸດຂອງກຸ່ມ 20 ປະເທດ, ຢ້ຽມຢາມທາງລັດຖະກິດຕໍ່ອົສຕຣາລີ, ນູແວນເຊລັງ ແລະຟີຈີ ພ້ອມທັງໄດ້ຈັດການພົບປະເປັນໝູ່ຄະນະກັບຜູ້ນຳຂອງປະເທດເກາະດອນໃນມະຫາສະໝຸດປາຊິຟິກທີ່ໄດ້ສ້າງສາຍພົວພັນທາງການທູດກັບຈີນແລ້ວ, ວັນທີ 23 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ເດີນທາງກັບຄືນມາຮອດປັກກິ່ງ. ທ່ານວາງຢີ້ ລັດຖະມົນຕີວ່າການກະຊວງການຕ່າງປະເທດຈີນ ໄດ້ໃຫ້ສຳພາດຕໍ່ນັກຂ່າວກ່ຽວກັບໝາກຜົນການຂອງຢ້ຽມຢາມເທື່ອນີ້.
ກ່ຽວກັບກອງປະຊຸມສຸດຍອດຂອງກຸ່ມ 20 ປະເທດ, ທ່ານວາງຢີ້ກ່າວວ່າ, ຄວາມຄິດເຫັນຕ່າງໆກ່ຽວກັບການຊຸກຍູ້ການແລກປ່ຽນກັນໃນດ້ານນະໂຍບາຍລະຫວ່າງປະເທດຕ່າງໆ, ການເຊື່ອມຕໍ່ເສັ້ນທາງ, ການຄ້າຢ່າງສະດວກ, ການຈໍລະຈອນເງິນຕາ ແລະຄວາມເຂົ້າໃຈກັນລະຫວ່າງປະຊາຊົນ ທີ່ທ່ານສີຈິ້ນຜິງສະເໜີອອກນັ້ນ ໄດ້ຮັບການຕອບຮັບຢ່າງຕັ້ງໜ້າຈາກຜູ້ນຳທີ່ຮ່ວມປະຊຸມ, ພວກເພິ່ນເຫຼົ່ານັ້ນຕ່າງກໍໄດ້ຕີລາຄາໃນລະດັບສູງຕໍ່ວິໄສທັດແລະມາດຕະການໃນການເປີດປະຕູທີ່ຈີນນຳສະເໜີ. ກອງປະຊຸມໄດ້ປະກາດວ່າ, ຈີນຈະເປັນເຈົ້າພາບຈັດກອງປະຊຸມສຸດຍອດຂອງກຸ່ມ 20 ປະເທດໃນປີ 2016, ທັງນີ້ໄດ້ສະແດງໃຫ້ເຫັນເຖິງຄວາມໝັ້ນໃຈແລະຄວາມໄວ້ວາງໃຈຂອງໂລກຕໍ່ຈີນ.
ກ່ຽວກັບການຢ້ຽມຢາມອົສຕຣາລີແລະນູແວນເຊລັງ, ທ່ານວາງຢີ້ກ່າວວ່າ, ອົສຕຣາລີແລະນູແວນເຊລັງ ແມ່ນປະເທດທີ່ສຳຄັນໃນພາກພື້ນອາຊີປາຊິຟິກ, ແລະກໍແມ່ນຜູ້ເຂົ້າຮ່ວມການຮ່ວມມືໃນພາກພື້ນຢ່າງຕັ້ງໜ້າ. ສອງປະເທດດັ່ງກ່າວລ້ວນແຕ່ມີຄວາມເຫັນໄປຕໍ່ອະນາຄົດຂອງຈີນໃນແງ່ດີ, ເອົາໃຈໃສ່ຕໍ່ໂອກາດທີ່ຈີນສ້າງຂຶ້ນ ແລະຫວັງຢາກໃຫ້ເພີ່ມທະວີການຮ່ວມມືກັບຈີນ.
ກ່ຽວກັບການຢ້ຽມຢາມປະເທດເກາະດອນໃນມະຫາສະໝຸດປາຊິຟິກ, ທ່ານວາງຢີ້ກ່າວວ່າ, ປະເທດເກາະດອນແມ່ນສະມາຊິກຂອງມະຫາຄອບຄົວອາຊີປາຊິຟິກ, ມີຊັບພະຍາກອນທາງທະເລຢ່າງອຸດົມສົມບູນ ແລະມີທ່າແຮງໃນດ້ານພູມີພາກ, ແມ່ນການເຊື່ອມຕໍ່ກັບເສັ້ນທາງສາຍໄໝທາງທະເລສະຕະວັດທີ 21 ແບບທຳມະຊາດ ແລະເປັນພາກສ່ວນທີ່ສຳຄັນຂອງການເຊື່ອມໂຍງເຂົ້າກັນຂອງປາຊີຟິຊິກ.