ວັນທີ 24 ພະຈິກນີ້, ຢູ່ນອກສະຖານທີ່ຈັດການເຈລະຈາບັນຫານີວເຄລຍອີຣານ, ທ່ານຫວາງຢີ້ ລັດຖະມົນຕີວ່າການກະຊວງການຕ່າງປະເທດຈີນທີ່ຫາກໍເດີນທາງໄປເຖິງນະຄອນຫຼວງວຽນຂອງໂອຕຣີສໄດ້ໃຫ້ສຳພາດຕໍ່ນັກຂ່າວຈີນແລະຕ່າງປະເທດໂດຍໄດ້ກ່າວເນັ້ນວ່າຈີນສະເໜີແນວຄວາມຄິດໃໝ່ເພື່ອແກ້ໄຂບັນຫາຈຸດສຸມໃນບັນຫານີວເຄລຍອີຣານ.
ທ່ານຫວາງຢີ້ກ່າວວ່າ, ການເຈລະຈາກ່ຽວກັບບັນຫານີວເຄລຍອີຣານໄດ້ເຂົ້າສູ່ໄລຍະຂໍກະແຈແລ້ວ, ການເຈລະຈາກຳລັງໄດ້ຮັບຄວາມຄືບໜ້າຢ່າງບໍ່ຢຸດຢັ້ງ. ຝາຍຈີນຢຶດຖືຫຼັກໝັ້ນທີ່ພາວະວິໄສແລະຍຸຕິທຳ, ຈີນໄດ້ດຳເນີນການໄກ່ເກ່ຍຫຼາຍເທື່ອ ລະຫວ່າງຝ່າຍຕ່າງໆໂດຍສະເພາະລະຫວ່າງອາເມລິກາກັບອີຣານ, ຊຸກຍູ້ໃຫ້ຝ່າຍຕ່າງໆຫຼຸດຜ່ອນຄວາມເຫັນທີ່ຂັດແຍ້ງກັນ, ເພີ່ມຄວາມຮັບຮູ້ທີ່ເປັນເອກະສັນກັນໃຫ້ຫຼາຍຂຶ້ນ.
ທ່ານຫວາງຢີ້ກ່າວວ່າ, ຝ່າຍຈີນຫວັງໃຫ້ບັນລຸສັນຍາຮອບດ້ານກ່ຽວກັບບັນຫານີວເຄລຍອີຣານໂດຍໄວ, ນີ້ຈະມີຜົນດີຕໍ່ປະຊາຊົນອີຣານສາ ມາດມີຊີວິດການເປັນຢູ່ທີ່ເປັນປົກກະຕິຫຼາຍກວ່າເກົ່າ, ມີຜົນດີຕໍ່ການປົກປັກຮັກສາລະບົບບໍ່ແຜ່ຂະຫຍາຍອາວຸດນີວເຄລຍໃນສາກົນ, ມີຜົນດີຕໍ່ການປົກປັກຮັກສາສັນຕິພາບແລະສະເຖຍລະພາບຂອງເຂດຕາເວັນອອກກາງ. ເທື່ອນີ້ຂ້າພະເຈົ້າໄດ້ຖືເອົາແຜນການຝ່າຍຈີນທີ່ກຳເນີດຈາກການສັງລວມຄວາມຄິດເຫັນຂອງຝ່າຍຕ່າງໆເພື່ອມາແກ້ໄຂບັນຫາຈຸດສຸມສຸດທ້າຍ.