ວັນທີ 24 ພະຈິກນີ້ຢູ່ທຳນຽບຂາວ, ທ່ານບາຣັກ ໂອບາມາ, ປະທານາທິບໍດີອາເມລິກາໄດ້ກ່າວຄຳປາໄສ, ປະກາດວ່າທ່ານໄດ້ຮັບຄຳຮ້ອງຂໍລາອອກຈາກຕຳແໜ່ງຂອງທ່ານຮາເກີ, ລັດຖະມົນຕີວ່າການກະຊວງປ້ອງກັນປະເທດອາເມລິກາທີ່ສົ່ງໃນວັນທີ 24 ພະຈິກນີ້. ທ່ານໂອບາມາໄດ້ຕີລາຄາສູງຕໍ່ຜົນງານຂອງທ່ານຮາເກີໃນດ້ານການຊຸກຍູ້ອາເມລິກາຖອນທະຫານຈາກອັຟການີສະຖານ, ການໂຈມຕີ "ISIS" ແລະຮັບມືກັບສະພາບລະບາດຂອງການພະຍາດອີໂບລາ, ແລະຍ້ອງຍໍທ່ານຮາເກີແມ່ນລັດຖະມົນຕີປ້ອງກັນປະເທດທີ່ເປັນແບບຢ່າງ. ທ່ານຮາເກີແມ່ນສະມາຊິກຄະນະລັດຖະບານຜູ້ທຳອິດທີ່ຂໍລາອອກຈາກຕຳແໜ່ງພາຍຫຼັງພັກປະຊາທິປະໄຕອາເມລິກາເສຍໄຊໃນການເລືອກຕັ້ງໄລຍະກາງ.
ທ່ານໂອບາມາກ່າວວ່າ, ທ່ານຮາເກີສິ້ນສຸດການດຳລົງຕຳແໜ່ງໃນປັດຈຸບັນແມ່ນ "ໂອກາດທີ່ເໝາະສົມ". ທ່ານຮາເກີຈະສືບຕໍ່ດຳລົງຕຳແໜ່ງຈົນຮອດລັດຖະມົນຕີປ້ອງກັນປະເທດອາເມລິກາຜູ້ໃໝ່ໄດ້ຮັບການຮັບຮອງຈາກສະພາສູງອາເມລິກາ.