ໃນກອງປະຊຸມຂ່າວທີ່ຈັດຂຶ້ນໃນວັນທີ 17 ທັນວານີ້, ທ່ານສິນກ່າງ, ໂຄສົກກະຊວງການຕ່າງປະເທດຈີນ ກ່າວວ່າ, ຝ່າຍຈີນລະນຶກເຖິງທ່ານເລຂາທິການໃຫຍ່ກິມເຈິງອິນທີ່ໄດ້ປະກອບສ່ວນອັນສຳຄັນເຂົ້າໃນການຊຸກຍູ້ສາຍພົວພັນໄມຕີຈິດມິດຕະພາບແລະການຮ່ວມມືອັນເປັນມູນເຊື້ອລະຫວ່າງຈີນ-ສປປ ເກົາຫຼີ, ຝ່າຍຈີນຍິນດີພະຍາຍາມຮ່ວມກັນກັບຝ່າຍ ສປປ ເກົາຫຼີເພື່ອຂະຫຍາຍການພົວພັນໄມຕີຈິດມິດຕະພາບແລະການຮ່ວມມືອັນເປັນມູນເຊື້ອລະຫວ່າງສອງປະເທດ.
ມີນັກຂ່າວຖາມໃນກອງປະຊຸມຂ່າວວ່າ: ມື້ນີ້ແມ່ນວັນລະນຶກເຖິງທ່ານກິມເຈິງອິນ, ອະດີດຜູ້ນຳ ສປປ ເກົາຫຼີໄດ້ເຖິງແກ່ມໍລະນະກຳຄົບຮອບ 3 ປີ, ຝ່າຍຈີນໄດ້ເຂົ້າຮ່ວມກິດຈະກຳໃນການລະນຶກວັນດັ່ງກ່າວທີ່ຈັດຂຶ້ນຢູ່ ສປປ ເກົາຫຼີ ຫຼື ຢູ່ສະຖານທູດ ສປປ ເກົາຫຼີປະຈຳປະເທດຈີນ ຫຼືບໍ່?
ທ່ານສິນກ່າງ ກ່າວວ່າ: ມື້ນີ້ແມ່ນວັນລະນຶກທ່ານເລຂາທິການໃຫຍ່ກິມເຈິງອິນເຖິງແກ່ກຳຄົບຮອບ 3 ປີ, ປັດຈຸບັນ, ຝ່າຍຈີນກໍໄດ້ລະນຶກເຖິງທ່ານເລຂາທິການໃຫຍ່ກິມເຈິງອິນທີ່ໄດ້ປະກອບສ່ວນອັນສຳຄັນເຂົ້າໃນການຊຸກຍູ້ການພົວພັນໄມຕີຈິດມິດຕະພາບແລະການຮ່ວມມືອັນເປັນມູນເຊື້ອລະຫວ່າງຈີນ-ສປປ ເກົາຫຼີ. ຕອນເຊົ້າມື້ນີ້, ທ່ານຫຼິວຢິນຊ່ານ, ກຳມະການປະຈຳກົມການເມືອງສູນກາງພັກ, ເລຂາທິການສູນກາງພັກກອມມູນິດຈີນໄດ້ເດີນທາງໄປສະຖານທູດ ສປປ ເກົາຫຼີປະຈຳປະເທດຈີນເພື່ອເຂົ້າຮ່ວມກິດຈະກຳລະນຶກທີ່ກ່ຽວຂ້ອງ.
ນອກຈາກນີ້, ທ່ານສິນກ່າງ ໄດ້ກ່າວຢ້ຳວ່າ, ຝ່າຍຈີນຍິນດີພະຍາຍາມຮ່ວມກັນກັບຝ່າຍ ສປປ ເກົາຫຼີ, ເພື່ອຂະຫຍາຍການພົວພັນມິດຕະພາບແລະການຮ່ວມມືອັນເປັນມູນເຊື້ອລະຫວ່າງສອງປະເທດ, ຮ່ວມກັນປົກປັກຮັກສາສັນຕິພາບ ແລະ ສະເຖຍລະພາບຂອງແຫຼມເກົາຫຼີ.
