ວັນທີ 17 ທັນວານີ້, ທ່ານເຈັນ ຄລາວເດີ ຈຸງເຄີ, ປະທານຄະນະກຳມະການສະຫະພາບເອີລົບໄດ້ກ່າວຢູ່ລັດຖະສະພາເອີລົບວ່າ, ການຊ່ວຍເຫຼືອຂອງສະຫະພາບເອີລົບຕໍ່ອູແກຣນທີ່ກຳລັງຕົກຢູ່ໃນສະພາບວິກິດການດ້ານການເມືອງແລະເສດຖະກິດໄດ້ເຂົ້າໃກ້ກັບລະດັບຄວາມສາມາດສູງສຸດຢ່າງເຕັມທີ່ແລ້ວ. ທ່ານກ່າວເນັ້ນວ່າ, ສະຫະພາບເອີລົບພຽງແຕ່ສາມາດຊ່ວຍເຫຼືອອູແກຣນພາຍໃນຂອບເຂດຄວາມສາມາດດ້ານງົບປະມານຂອງຕົນ.
ປະເທດສະມາຊິກສະຫະພາບເອີລົບຈະຈັດກອງປະຊຸມສຸດຍອດລະດູໜາວຢູ່ນະຄອນຫຼວງບຣຸກແຊນຂອງແບນຊິກແຕ່ວັນທີ 18 ຫາວັນທີ 19 ທັນວານີ້, ຊຶ່ງມີວາລະແຕ່ລະມື້ລວມທັງການປຶກສາຫາລືກ່ຽວກັບວິກິດການອູແກຣນ. ທ່ານເຈັນ ຄລາວເດີ ຈຸງເຄີກ່າວວ່າ, ປີນີ້, ສະຫະພາບເອີລົບໄດ້ໃຫ້ການຊ່ວຍເຫຼືອດ້ານການເງິນສອງງວດແກ່ອູແກຣນຕາມລຳດັບຊຶ່ງມີມູນຄ່າເຖິງ 1 ຕື້ 360 ລ້ານເອີໂຣ, ຖ້າການປະຕິຮູບດ້ານການເມືອງຂອງອູແກຣນມີສະພາບທ່າອ່ຽງດີຂຶ້ນ, ໃນປີໜ້າ, ສະຫະພາບເອີລົບຈະເພີ່ມການຊ່ວຍເຫຼືອດ້ານການເງິນອີກງວດໜຶ່ງທີ່ເປັນງວດທີສາມໃຫ້ແກ່ອູແກຣນຊຶ່ງມີມູນຄ່າເຖິງ 250 ລ້ານເອີໂຣ.
ບົດລາຍງານປະເມີນເສດຖະກິດອູແກຣນຂອງອົງການກອງທຶນເງິນຕາສາກົນຫຼື IMF ເຫັນວ່າ, ອູແກຣນຕ້ອງການຄວາມຊ່ວຍເຫຼືອທີ່ມີມູນຄ່າເຖິງ 15 ຕື້ເອີໂຣ.
 |
