ອົງການສະບຽງອາຫານແລະກະສິກຳສະຫະປະຊາຊາດກ່າວວ່າ ພະຍາດອີໂບລາຈະເຮັດໃຫ້ລ້ານກວ່າຄົນປະເຊີນຄວາມອຶດຢາກຢູ່ສາມປະເທດອາຟຣິກາຕາເວັນຕົກ

ວັນທີ 17 ທັນວານີ້, ອົງການສະບຽງອາຫານແລະກະສິກຳສະຫະປະຊາຊາດຫຼື FAO ແລະໂຄງການສະບຽງອາຫານໂລກຫຼື WFP ໄດ້ຮ່ວມກັນກ່າວຄຳເຕືອນຢູ່ນະຄອນຫຼວງໂຣມຂອງອີຕາລີວ່າ, ເນື່ອງຈາກໄດ້ຖືກຜົນກະທົບຈາກພະຍາດອີໂບລາ, ຄາດວ່າຮອດເດືອນມີນາປີ 2015, ຈຳນວນຄົນທີ່ປະເຊີນກັບບັນຫາບໍ່ປອດໄພດ້ານອາຫານຢູ່ສາມປະເທດຄືກີເນ, ລີເບຣີແລະເຊຣາລີໂອນຈະຫຼາຍກວ່າລ້ານຄົນ.

ບົດລາຍງານໄດ້ລະບຸໄວ້ວ່າ, ການປິດດ່ານ, ການກັກກັນເພື່ອກວດເຊື້ອພະຍາດ, ຂໍ້ຫ້າມລ່າສັດແລະມາດຕະການຈຳກັດອື່ນໆທີ່ເກີດຂຶ້ນຍ້ອນພະຍາດອີໂບລາໄດ້ກີດຂວາງຊ່ອງທາງຮັບເອົາອາຫານຂອງປະຊາຊົນຢ່າງໜັກໜ່ວງ, ພ້ອມທັງໄດ້ທຳລາຍຕະຫຼາດສະບຽງອາຫານແລະຕ່ອງໂສ້ຜະລິດ, ເຊິ່ງໄດ້ເຮັດໃຫ້ເຄື່ອງປູກຂອງຝັງມີຄວາມເສຍຫາຍແລະໄດ້ກໍ່ໃຫ້ເກີດບັນຫາຂາດແຄນອາຫານຢ່າງໜັກໜ່ວງ.

ບົດລາຍງານໄດ້ແຈ້ງໃຫ້ເຫັນວ່າ, ປະຈຸບັນນີ້, ຈຳນວນຄົນທີ່ປະເຊີນກັບບັນຫາບໍ່ປອດໄພດ້ານອາຫານຢູ່ກີເນມີ 230,000 ຄົນ, ລີເບຣີມີ 170,000 ຄົນແລະເຊຣາລີໂອນມີ 120,000 ຄົນ, ຮອດເດືອນມີນາປີ 2015, ຄາດວ່າຕົວເລກດັ່ງກ່າວຈະເພີ່ມຂຶ້ນຮອດ 470,000 ຄົນ, 300,000 ຄົນແລະ 280,000 ຄົນຕາມລຳດັບ. ແລະຍອດປະລິມານຜະລິດອາຫານຂອງກີເນຈະຫຼຸດລົງ 3%, ລີເບຣີຈະຫຼຸດລົງ 8%, ແລະ ເຊຣາລີໂອນຈະຫຼຸດລົງ 5%.