ວັນທີ 23 ມັງກອນນີ້, ພິທີເປີດກິດຈະກຳ "ປີທ່ອງທ່ຽວຈີນ" ຈັດຂຶ້ນຢູ່ນະຄອນຫຼວງເຊອູນຂອງສ.ເກົາຫຼີ. ທ່ານສີຈີ້ນຜິງ ປະທານປະເທດຈີນ ແລະທ່ານນາງ ປະເກີນເຮ ປະທານາທິບໍດີສ.ເກົາຫຼີຕ່າງໄດ້ຝາກຈົດໝາຍອວຍພອນໃຫ້. ທ່ານວາງຢຽງ ຮອງນາຍົກລັດຖະມົນຕີຈີນ ແລະທ່ານຮວງໂວເຢຍ ຮອງນາຍົກລັດຖະມົນຕີສ.ເກົາຫຼີ ພ້ອມກັນເຂົ້າຮ່ວມພິທີເປີດ.
ທ່ານວາງຢຽງ ຮອງນາຍົກລັດຖະມົນຕີຈີນອ່ານຈົດໝາຍອວຍພອນຂອງທ່ານສີຈີ້ນຜິງ ປະທານປະເທດຈີນ ແລະກ່າວຄໍາປາໄສ
ໃນຈົດໝາຍອວຍພອນ, ທ່ານສີຈີ້ນຜິງ ໄດ້ສະແດງຄວາມອວຍພອນຕໍ່ການເປີດກິດຈະກຳ "ປີທ່ອງທ່ຽວຈີນ", ແລະຝາກຄວາມຢື້ຢາມຖາມຂ່າວອັນຈິງໃຈໄປຍັງປະຊາຊົນສ.ເກົາຫຼີ. ຫວັງໃຫ້ສອງຝ່າຍຈີນແລະສ.ເກົາຫຼີ ຈະຖືກິດຈະກຳນີ້ເປັນໂອກາດ, ເພີ່ມທະວີການຮ່ວມມືໃນດ້ານການທ່ອງທ່ຽວ ແລກປ່ຽນວັດທະນະທຳຢ່າງຮອບດ້ານ, ເພື່ອປະກອບສ່ວນໃໝ່ ເຂົ້າໃນການຊຸກຍູ້ການຂະຫຍາຍການພົວພັນສອງຝ່າຍ ແລະເພີ່ມທະວີມິດຕະພາບ ຄວາມຮັກແພງລະຫວ່າງປະຊາຊົນສອງຊາດ.
ທ່ານຮວງໂວເຢຍ ຮອງນາຍົກລັດຖະມົນຕີສ.ເກົາຫຼີອ່ານຈົດໝາຍອວຍພອນຂອງທ່ານນາງປະເກີນເຮ ປະທານາທິບໍດີສ.ເກົາຫຼີ ແລະກ່າວຄຳປາໄສ
ໃນຈົດໝາຍອວຍພອນ, ທ່ານນາງປະເກີນເຮ ກ່າວວ່າ, ຫວັງໃຫ້ສອງປະເທດພັດທະນາການຮ່ວມມືໃນດ້ານການທ່ອງທ່ຽວດ້ວຍນ້ຳໃຈປະດິດສ້າງໃໝ່ຂອງຕົນ, ຫວັງໃຫ້ປະຊາຊົນສອງປະເທດໄປມາຫາສູ່ກັນຫຼາຍກວ່າເກົ່າ, ຊອກຮູ້ປະຫວັດສາດ ວັດທະນະທຳແລະຮີດຄອງປະເພນີຂອງກັນ, ເພີ່ມທະວີມິດຕະພາບແລະຄວາມໄວ້ເນື້ອເຊື່ອໃຈກັນ, ເຮັດໃຫ້ສອງປະເທດກາຍເປັນບ້ານໃກ້ເຮືອນຄຽງທີ່ສະໜິດແໜ້ນກວ່າເກົ່າ.
ຕຸກກະຕານຳໂຊກຂອງກິດຈະກຳ "ປີທ່ອງທ່ຽວ"
ຫຼັງຈາກເປີດກິດຈະກຳ "ປີທ່ອງທ່ຽວຈີນ" ຢ່າງເປັນທາງການແລ້ວ, ກົມການທ່ອງທ່ຽວແຫ່ງລັດຈີນຈະຈັດກິດຈະກຳແລກປ່ຽນການທ່ອງທ່ຽວຕ່າງໆ, ຈຳນວນກິດຈະກຳຫຼາຍກວ່າ 110 ກວ່າເທື່ອ. ສອງຝ່າຍຈີນແລະສ.ເກົາຫຼີຄອງຄອຍຖື "ປີທ່ອງທ່ຽວ" ເປັນໂອກາດ, ເປີດສາກໃຫ້ແກ່ຍຸກສະໄໝໃໝ່ແຫ່ງການຮ່ວມມືໃນດ້ານການທ່ອງທ່ຽວແລະການໄປມາຫາສູ່ກັນຂອງປະຊາຊົນສອງປະເທດ.
