ຈັດກອງປະຊຸມຄັ້ງທຳອິດຂອງການສົນທະນາທາງດ້ານເສດຖະກິດລະຫວ່າງການນຳຂັ້ນສູງຈີນ-ອິນໂດເນເຊຍ

ກອງປະຊຸມຄັ້ງທຳອິດຂອງການສົນທະນາທາງດ້ານເສດຖະກິດລະຫວ່າງການນຳຂັ້ນສູງຈີນ-ອິນໂດເນເຊຍໄດ້ຈັດຂຶ້ນຢູ່ທີ່ນະຄອນຫຼວງປັກກິ່ງໃນວັນທີ 26 ມັງກອນນີ້, ໂດຍມີທ່ານຢາງເຈສື(ຜູ້ຢູ່ເບື້ອງຂວາ), ທີ່ປຶກສາແຫ່ງລັດຈີນ ແລະ ທ່ານໂຊຟຽນ ເຊີຣີ,(ຜູ້ຢູ່ເບື້ອງຊ້າຍ) ລັດຖະມົນຕີວ່າການກະຊວງວາງແຜນລວມເສດຖະກິດອິນໂດເນເຊຍ ເປັນປະທານກອງປະຊຸມຮ່ວມ, ກອງປະຊຸມຄັ້ງນີ້ໄດ້ຈັດຂຶ້ນເພື່ອຈັດຕັ້ງປະຕິບັດຕາມຂໍ້ຕົກລົງຂອງຜູ້ນຳທັງສອງປະເທດ ແລະ ແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບຫົວຂໍ້ຮ່ວມມືທີ່ສຳຄັນ ເຊັ່ນ ເສດຖະກິດການຄ້າ ແລະ ການລົງທຶນ.

ສອງຝ່າຍເປັນເອກະສັນກັນເຫັນວ່າ, ໃນຊຸມປີຜ່ານມານີ້, ການຮ່ວມມືດ້ານເສດຖະກິດການຄ້າລະຫວ່າງຈີນ-ອິນໂດເນເຊຍໄດ້ຮັບໝາກຜົນອັນອຸດົມສົມບູນຂຶ້ນ. ຂໍ້ລິເລີ່ມຂອງທ່ານປະທານສີຈິ້ນຜິງ ກ່ຽວກັບການຮ່ວມກັນສ້າງ "ເສັ້ນທາງສາຍໄໝທາງທະເລສະຕະວັດທີ 21" ແລະ ແນວຄວາມຄິດຍຸດທະສາດຂອງທ່ານປະທານາທິບໍດີໂຈໂຄ ວີໂດໂດ ກ່ຽວກັບການສ້າງປະເທດໃຫ້ເຂັ້ມແຂງທາງດ້ານທະເລ ແມ່ນມີຈຸດທີ່ສອດຄ່ອງກັນໃນດ້ານຍຸດທະສາດຢ່າງກວ້າງຂວາງ, ເຊິ່ງໄດ້ສະໜອງຊ່ອງທາງອັນກວ້າງຂວາງໃຫ້ແກ່ສອງຝ່າຍໃນການລົງເລິກການຮ່ວມມືທີ່ແທ້ຈິງໃນຂົງເຂດຕ່າງໆ ແລະ ຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານຈີນ-ອິນໂດເນເຊຍ.

ທ່ານຢາງເຈສື ກ່າວວ່າ: ສອງຝ່າຍຄວນຂະຫຍາຍຂະໜາດການຄ້າສອງຝ່າຍໃຫ້ກວ້າງອອກຕື່ມອີກ, ເພີ່ມທະວີການຮ່ວມມືໃນຂົງເຂດຕ່າງໆ ເຊັ່ນ ການກໍ່ສ້າງພື້ນຖານໂຄງລ່າງທີ່ສຳຄັນ ແລະ ພະລັງງານໄຟຟ້າ, ເພື່ອຊຸກຍູ້ການຮ່ວມມືດ້ານເສດຖະກິດລະຫວ່າງຈີນ-ອິນໂດເນເຊຍໃຫ້ຕ່າງຝ່າຍຕ່າງມີຜົນປະໂຫຍດ ແລະ ມີການພັດທະນາຮ່ວມກັນ.

ທ່ານໂຊຟຽນ ເຊີຣີ ກ່າວວ່າ: ຝ່າຍອິນໂດເນເຊຍຍິນດີຮ່ວມກັບຝ່າຍຈີນ, ເພື່ອຂຸດຄົ້ນຄວາມສາມາດບົ່ມຊ້ອນແຫ່ງການຮ່ວມມືໃນຂົງເຂດຕ່າງໆ ເຊັ່ນ ການລົງທຶນ, ການຄ້າ, ການກໍ່ສ້າງພື້ນຖານໂຄງລ່າງ ແລະ ການກໍ່ສ້າງເຂດເສດຖະກິດພິເສດອິນໂດເນເຊຍ, ທັງຊຸກຍູ້ການຮ່ວມມືດ້ານເສດຖະກິດການຄ້າລະຫວ່າງອິນໂດເນເຊຍ-ຈີນໃຫ້ເຂົ້າສູ່ລວງເລິກ.

1 2