ທ່ານມານູເອນ ວານສ ນາຍົກລັດຖະມົນຕີຝະຣັ່ງຈະດຳເນີນການຢ້ຽມຢາມຈີນຢ່າງເປັນທາງການແຕ່ວັນທີ 29-31 ມັງກອນນີ້. ນີ້ແມ່ນເທື່ອທຳອິດທີ່ທ່ານວານສຢ້ຽມຢາມຈີນພາຍຫຼັງທີ່ໄດ້ຂຶ້ນດຳລົງຕຳແໜ່ງນາຍົກລັດຖະມົນຕີຝະຣັ່ງ. ເມື່ອມໍ່ໆມານີ້, ທ່ານວານສໄດ້ໃຫ້ສຳພາດຕໍ່ນັກຂ່າວຈາກສຳນັກຂ່າວສານຊິນຮວາ ເຊິ່ງເປັນສຳນັກຂ່າວສານແຫ່ງຊາດຈີນ, ທ່ານກ່າວວ່າ ການແລກປ່ຽນຢ້ຽມຢາມກັນລະຫວ່າງຝະຣັ່ງ-ຈີນມີປະຫວັດມາເປັນເວລາດົນນານແລະເຕັມໄປດ້ວຍຊີວິດຊີວາ, ຝະຣັ່ງຫວັງຢາກເພີ່ມທະວີການຮ່ວມມືກັບຈີນໃນຫຼາຍຂົງເຂດໃນຕໍ່ໜ້າ.
ທ່ານວານສກ່າວວ່າ ສາຍພົວພັນຝະຣັ່ງ-ຈີນມີຈຸດເດັ່ນສອງຂໍ້ຄື ມີປະຫວັດອັນຍາວນານແລະເຕັມໄປດ້ວຍຊີວິດຊີວາ. ປີນີ້, ສອງປະເທດຈະເພີ່ມທະວີການຮ່ວມມືໃນຫຼາຍຂົງເຂດ. ພາຍຫຼັງຝະຣັ່ງເກີດເຫດການຖືກຫຼອນໂຈມຕີແບບກໍ່ການຮ້າຍແລ້ວ, ຝະຣັ່ງ-ຈີນຕັດສິນໃຈເພີ່ມທະວີການຮ່ວມມືໃນຂົງເຂດຕ້ານການກໍ່ການຮ້າຍ; ໃນຂົງເຂດເສດຖະກິດ, ການຮ່ວມມືລະຫວ່າງສອງຝ່າຍໄດ້ຮັບຜົນສຳເລັດອັນອຸດົມສົມບູນ ໂດຍສະເພາະແມ່ນໃນຂົງເຂດການບິນແລະຂະແໜງການລົດຍົນ; ສອງປະເທດຍັງຕົກລົງເພີ່ມທະວີການຮ່ວມມືກ່ຽວກັບບັນຫາສິ່ງແວດລ້ອມ, ຈີນສາມາດເສີມຂະຫຍາຍບົດບາດສຳຄັນເພື່ອເຮັດໃຫ້ກອງປະຊຸມໃຫຍ່ດິນຟ້າອາກາດຂອງໂລກທີ່ປາຣີ2015ຈັດຂຶ້ນຢ່າງສຳເລັດຜົນ.
 |
