ວັນທີ 27 ມັງກອນນີ້, ສະພາມົນຕີເອີຣົບໄດ້ອອກຖະແຫຼງການ ໂດຍກ່າວວ່າ, ເນື່ອງຈາກສະຖານະການຢູ່ອູແກຣນໄດ້ຮ້າຍແຮງຂຶ້ນໂດຍຕະຫຼອດມາ, ຜູ້ນຳຂອງປະເທດສະມາຊິກສະຫະພາບເອີຣົບຈຶ່ງຮຽກຮ້ອງໃຫ້ພິຈາລະນາເພື່ອໃຊ້ມາດຕະການລົງໂທດຕໍ່ຣັດເຊຍຕື່ມອີກ.
ຖະແຫຼງການຊີ້ອອກວ່າ: ສະຫະພາບເອີຣົບກ່າວປະນາມຕໍ່ເຫດການໂຈມຕີດ້ວຍປືນໃຫຍ່ຕໍ່ເຂດຊຸມຊົນທີ່ເມືອງມາຣີອູໂປນ ທາງພາກຕາເວັນອອກຂອງອູແກຣນທີ່ເກີດຂຶ້ນໃນວັນທີ 24 ມັງກອນນີ້, ແລະມີຫຼັກຖານສະແດງໃຫ້ເຫັນວ່າ ຣັດເຊຍໃຫ້ການສະໜັບສະໜູນແກ່ກອງປະກອບອາວຸດປະຊາຊົນພາກຕາເວັນອອກອູແກຣນນັ້ນນັບມື້ນັບເພີ່ມຂຶ້ນ, ທັງຮຽກຮ້ອງໃຫ້ຣັດເຊຍກ່າວປະນາມການເຄື່ອນໄຫວຂອງກອງປະກອບອາວຸດປະຊາຊົນພາກຕາເວັນອອກອູແກຣນ, ເພື່ອຈັດຕັ້ງປະຕິບັດສັນຍາມິນສ໌ຄ໌ທີ່ມີຈຸດປະສົງເພື່ອໃຫ້ບັນລຸການຢຸດຍິງຢູ່ພາກຕາເວັນອອກອູແກຣນ.
ຖະແຫຼງການກ່າວຕື່ມວ່າ: ຜູ້ນຳຂອງປະເທດສະມາຊິກສະຫະພາບເອີຣົບຮຽກຮ້ອງໃຫ້ຈັດກອງປະຊຸມລັດຖະມົນຕີຕ່າງປະເທດສະຫະພາບເອີຣົບໃນເດືອນກຸມພາໜ້ານີ້ເພື່ອປະເມີນສະຖານະການອູແກຣນ, ແລະພິຈາລະນາໃຊ້ມາດຕະການລົງໂທດຕໍ່ຣັດເຊຍຕື່ມອີກ, ເພື່ອຊຸກຍູ້ໃຫ້ສັນຍາມິນສ໌ຄ໌ໄດ້ຮັບການຈັດຕັ້ງປະຕິບັດຢ່າງຮອບດ້ານແລະວ່ອງໄວ.