ວັນທີ 27 ມັງກອນນີ້, ທ່ານເຝິງຈູຮວາ, ກຳມະການປະຈຳສະພາປຶກສາການເມືອງປະຊາຊົນເຂດປົກຄອງຕົນເອງເຜົ່າຈ້ວງກວາງຊີ, ຫົວໜ້າຫ້ອງການວຽກງານຊາວຈີນຕ່າງດ້າວເຂດກວາງຊີຈີນ ກ່າວວ່າ: "ເສັ້ນທາງສາຍໄໝທາງທະເລສະຕະວັດທີ 21" ແມ່ນແລວທາງເສດຖະກິດ, ແລວທາງມິດຕະພາບ ແລະ ແລວທາງວິທະຍາສາດເຕັກນິກທີ່ມີການແລກປ່ຽນກັນດ້ານເຕັກນິກທີ່ທັນສະໄໝກ້າວໜ້າ. ສ່ວນເຂດກວາງຊີແມ່ນຊ່ອງທາງ ແລະ ດ່ານຍຸດທະສາດ "ແລວທາງເສດຖະກິດເສັ້ນທາງສາຍໄໝ ແລະ ເສັ້ນທາງສາຍໄໝທາງທະເລສະຕະວັດທີ 21" ຂອງຈີນ, ທັງມີການພົວພັນກັບບັນດາປະເທດອາຊຽນນຳອີກ. ປັດຈຸບັນ, ຄຽງຄູ່ກັບການສ້າງເຂດເສດຖະກິດອ່າວເປີຍປູ້ ແລະ ແລວທາງເສດຖະກິດຈູ່ຈ່ຽງ-ຊີ່ຈ່ຽງໄດ້ຂຶ້ນເປັນຍຸດທະສາດລະດັບຊາດ, ໄດ້ສ້າງໂອກາດທຸລະກິດຢ່າງບໍ່ຢຸດຢັ້ງ, ແລະມີກຳລັງບົ່ມຊ້ອນດ້ານການພັດທະນາທີ່ບໍ່ສາມາດປະເມີນໄດ້.
ທ່ານເຝິງຈູຮວາ ກ່າວຕື່ມວ່າ: ຊາວຕ່າງປະເທດເຊື້ອສາຍຈີນແລະຈີນຕ່າງດ້າວທີ່ອາໄສຢູ່ບັນດາປະເທດອາຊີຕາເວັນອອກສຽງໃຕ້ມີຈຳນວນຫຼວງຫຼາຍ, ສະມາຄົມຊາວຈີນທ້ອງຖິ່ນມີຄວາມສາມາດອັນເຂັ້ມແຂງ, ຖ້າພວກເຂົາເຂົ້າຮ່ວມໃນການສ້າງ "ແລວທາງເສດຖະກິດເສັ້ນທາງສາຍໄໝ ແລະ ເສັ້ນທາງສາຍໄໝທາງທະເລສະຕະວັດທີ 21", ກໍຈະສາມາດເສີມຂະຫຍາຍບົດບາດອັນສຳຄັນໃນການຊຸກຍູ້ການຊ່ວຍຊູຍູ້ໜູນກັນໂດຍທ່າແຮງ, ການຫັນປ່ຽນອົງປະກອບ ແລະ ການຍົກລະດັບຂອງອຸດສາຫະກຳໃນພາກພື້ນ.
