ຕອນຄ່ຳວັນທີ 27 ມັງກອນນີ້, ທ່ານດີມີຕຣີ ເມັດເວເດັຟ ນາຍົກລັດຖະມົນຕີ ສະຫະພັນຣັດເຊຍໄດ້ເຊັນລັດຖະດຳລັດ ເພື່ອປະຕິບັດແຜນການຕ້ານວິກິດການຂອງລັດ. ໃນມື້ດຽວກັນ, ທ່ານອັນຕົນ ຊີລູອານົຟ ລັດຖະມົນຕີວ່າການກະຊວງການເງິນຂອງຣັດເຊຍໄດ້ໃຫ້ຮູ້ວ່າ, ປັດຈຸບັນ, ແຜນການດັ່ງກ່າວຈະມີເງິນສະສົມປະມານ 3 ຕື້ໂດລາສະຫະລັດ.
ຂ່າວແຈ້ງວ່າ, ເປົ້າໝາຍຂອງແຜນການຕ້ານວິກິດການສະບັບນີ້ແມ່ນ: ຊຸກຍູ້ການເຕີບໂຕທາງເສດຖະກິດ, ສະໜັບສະໜູນພາກສ່ວນທີ່ສຳຄັນ, ຮັບປະກັນຄວາມສະຫງົບທາງສັງຄົມ. ຂ່າວສານຕັສໄດ້ຍົກເອົາຂໍ້ມູນຕົວເລກມາລາຍງານວ່າ, ແຜນການຕ້ານວິກິດການຈະໃຊ້ງົບປະມານ 21 ຕື້ 200 ລ້ານໂດລາ, ເຊິ່ງຈະໃຊ້ເຂົ້າໃນສະຖາບັນການເງິນ, ການກໍ່ສ້າງພື້ນຖານໂຄງລ່າງ, ກະສິກຳ, ອຸດສາຫະກຳ ແລະຂົງເຂດອື່ນໆ.
ທ່ານຊີລູອານົຟຊີ້ບອກວ່າ: "ພວກຂ້າພະເຈົ້າຈະບໍ່ນຳໃຊ້ຄັງສຳຮອງແຫ່ງລັດເພື່ອຕ້ານວິກິດການຢ່າງມະລຸ່ມມະລ້ວຍ, ຫາກຈະໃຊ້ມາດຕະການ, ພາຍໃນໄລຍະເວລາຂອງແຜນການສະບັບນີ້ຄາດວ່າປະມານ 1 ປີ, ຈະຊຸກຍູ້ການປັບປຸງອົງປະກອບ, ຍົກຄຸນນະພາບຂອງການຄຸ້ມຄອງແລະງົບປະມານການເງິນໃຫ້ສູງຂຶ້ນ, ເພື່ອຮັບປະກັນເງິນສະສົມໃນຈຳນວນໃດໜຶ່ງ."
 |
