ວັນທີ 25 ກຸມພານີ້, ກອງອາສາສະໝັກແພດໝໍທີ່ຈັດຕັ້ງໂດຍກະຊວງສາທາ ລະນະສຸກກຳປູເຈຍ ໄດ້ດຳເນີນກິດຈະກຳລົງໄປຊົນນະບົດຢູ່ເຂດປົນຊັງເມືອງປຣີກປນົຟນະຄອນຫຼວງພະນົມເປັນ, ມື້ດຽວກັນ, ສູນປິ່ນປົວປົນຊັງໄດ້ເລີ່ມເປີດບໍລິການຢ່າງເປັນທາງການ. ທ່ານມາມບູນແຮງ ລັດຖະມົນຕີວ່າການກະຊວງສາທາລະນະສຸກ, ເຈົ້າໜ້າທີ່ອົງການປົກຄອງທ້ອງຖິ່ນແລະຊາວບ້ານ 500 ກວ່າຄົນຂອງກຳປູເຈຍໄດ້ເຂົ້າຮ່ວມກິດຈະກຳດັ່ງກ່າວ.
ໃນເວລາກ່າວຄຳປາໄສ, ທ່ານມາມບູນແຮງ ລັດຖະມົນຕີວ່າການກະຊວງສາທາລະນະສຸກກຳປູເຈຍກ່າວວ່າ, ຫວັງວ່າ ສູນປິ່ນປົວປົນຊັງຈະອຳນວຍຄວາມສະດວກໃຫ້ແກ່ການປິ່ນປົວພະຍາດຂອງຊາວບ້ານຫຼາຍກວ່າເກົ່າ. ທ່ານຮຽກຮ້ອງໃຫ້ຊາວບ້ານເມື່ອເຈັບໄຂ້ໄດ້ພະຍາດແລ້ວກໍຄວນໄປໂຮງໝໍຢ່າງທັນການ, ບໍ່ຄວນໄປຮັບການປິ່ນປົວຢູ່ອົງການປິ່ນປົວທີ່ບໍ່ຊອບດ້ວຍກົດໝາຍ.
ທ່ານມາມບູນແຮງຍັງໄດ້ໄປກວດກາສູນປິ່ນປົວປົນຊັງ, ໄດ້ເບິ່ງວຽກງານປິ່ນປົວພະຍາດໂດຍບໍ່ເກັບຄ່າ, ທັງໄດ້ໄປຢື້ຢາມຖາມຂ່າວຕໍ່ຄົນເຈັບທີ່ກຳລັງຮັບການປິ່ນປົວພະຍາດຢູ່ໂຮງໝໍດັ່ງກ່າວ. ພ້ອມກັນນັ້ນ, ທ່ານຍັງໄດ້ແລກປ່ຽນກັບພະນັກງານການແພດແລະຊາວບ້ານຢ່າງສະໜິດສະໜົມ ເພື່ອຊອກຮູ້ຄວາມຮຽກຮ້ອງຕ້ອງ ການຂອງຊາວບ້ານໃນການປິ່ນປົວພະຍາດ.
ກອງອາສາສະໝັກແພດໝໍທີ່ຈັດຕັ້ງໂດຍກະຊວງສາທາລະນະສຸກກຳປູເຈຍເທື່ອນີ້ ປະກອບດ້ວຍກອງນ້ອຍແພດໝໍຂອງໂຮງໝໍ 6 ແຫ່ງຂອງພະນົມເປັນ, ເຊິ່ງໃນນັ້ນ, ກໍມີໂຮງໝໍມິດຕະພາບຈີນ-ກຳປູເຈຍທີ່ຈີນຊ່ວຍເຫຼືອສ້າງຂຶ້ນ.
